Qazaqstan Respýblikasy Premer-Ministriniń orynbasary Imanǵali Tasmaǵambetov 2017-2020 jyldarǵa arnalǵan ǵylymdy damytýdyń basym baǵyttary jóninde keńes ótkizdi, dep habarlaidy "Ult aqparat" QR Premer-Ministriniń resmi saityna silteme jasap.
Búgingi tańda barlyq meleketter adamzat qyzmetiniń strategiialyq mańyzdy salasy retinde ǵylymdy damytýǵa erekshe kóńil bóledi. Ol eldiń básekege qabylettiligi men ekonomikalyq ósimin qamtamasyz etetin negizgi resýrs sanalady.
Eldiń ǵylymi áleýetin kóterý kóptegen faktorlarǵa bailanysty, onyń ishinde ǵylymi-tehnikalyq qyzmetti kommertsiialandyrý da bar. Bul úrdisti retteitin qujattardyń biri – «Ǵylymi jáne (nemese) ǵylymi-tehnikalyq qyzmet nátijelerin kommertsiialandyrý týraly» Qazaqstan Respýblikasynyń Zańy. Onyń aiasynda údemeli jáne kommertsiialyq tiimdi jobalar júzege asyrylýda.
«Biz qansha jobany júzege asyramyz, neni qarjylandyramyz, ol qansha ýaqytqa sozylady. Munyń barlyǵyn naqty ári anyq túsinýimiz qajet. Eń bastysy, odan qandai qaitarym bolatynyn bilýimiz tiis», - dedi keńeste I. Tasmaǵambetov.
Qarjylandyrý kólemi, zertteýdiń nátijeliligi jáne ony iske asyrý qarjylandyrý mehanizmi men baqylaýǵa táýeldi. Sonymen qatar, ǵalym bir mezette ǵylymmen jáne onyń nátijelerin ónidiriske engizýmen sátti ainalysa almaidy. Bul úshin quzyrly qurylymdar men mamandar tartylýy kerek. Sondai-aq, ǵylymi zertteýlerdi óndiriske engizýdi synaý úshin óndiristik-tájiribelik baza qurýdy qarastyrý mańyzdy.
«Sońǵy 20 jylda álemde bizdiń tehnologiialardy kommertsiialaýǵa jeke investorlar 370 mln dollar qarjy saldy. Qazirgi ýaqytta qazaqstandyq tehnologiia boiynsha zaýyt qurylysyn salýǵa 3,5 mlrd dollar bólindi. Jyl saiyn 4 mlrd dollardy quraityn taza metall shyǵarylady. Onyń úshten bir bóligi Qazaqstanda, qalǵany shetelde óndiriledi», - dep atap ótti «QR mineraldy shikizatty keshendi uqsatý jónindegi ulttyq ortalyǵy» RMK bas direktory Ábdirasyl Jarmenov.
Qazaqstannyń ǵalymdary men ǵylymi mekemeleriniń ǵylym indýstriiasynyń negizi bolýdaǵy áleýeti joǵary. Bul úshin ǵylym men óndiris arasynda tyǵyz bailanys ornatylyp, ekonomikanyń naqty sektory ǵylymi mindetterdi aiqyndap otyrýy tiis.
