Ótken aptada Djýzeppe Konte Italiianyń premer-ministri qyzmetinen ketken soń italiialyqtar úkimettiń jańa basshysynyń maquldaýyn kútýde, dep habarlaidy QazAqparat.
Italiiada premer-ministrler jii aýysady. Sońǵy 75 jylda bul elde orta eseppen 14 aida bir premer-ministr keledi eken. Áitse de Konteniń qyzmetinen ketýi - italiialyqtardyń kópshiligi úshin kútpegen jaǵdai boldy. Sebebi saiasatker taiaýda ǵana zań shyǵarýshy organnyń eki palatasynyń da qoldaýyna ie bolǵan edi.
Alaida Italiianyń ekonomikalyq jaǵdaiy qazir qiyn kezeńdi bastan keship jatyr. Ekonomikanyń negizgi salalarynyń biri - týrizm pandemiia kezinde úlken shyǵynǵa ushyrady. 2020 jyly Italiia ekonomikasy 9%-ǵa qysqardy. Jumyssyzdyq deńgeii 10%-dy quraidy. Jumyssyzdyq deńgeii ásirese jastar arasynda joǵary bolyp tur.
Dj. Konte úkimeti otstavkaǵa ketkennen keiin Italiia prezidenti Serjio Mattarella óziniń konstitýtsiialyq quqyǵyn paidalanyp, osy qyzmetke ekonomist ári Eýropalyq Ortalyq banktiń burynǵy prezidenti Mario Dragidiń kandidatýrasyn usyndy.
Bekitilgen tártipke sáikes, Italiia premer-ministrin Respýblika Prezidenti taǵaiyndaidy. Sodan keiin premer-ministr qyzmetinde qalý úshin ulttyq parlamenttiń senimine ie bolýy kerek. Laýazymnyń ózi resmi túrde premer-ministr emes, Ministrler keńesiniń tóraǵasy dep atalady.
M.Dragi parlamenttegi depýtattardyń kópshiliginiń maquldaýyn alǵanǵa deiin Dj.Konteniń burynǵy úkimeti óz qyzmetinde qala beredi. Eger Italiiada saiasi partiialar M.Dragidiń kandidatýrasy jóninde ortaq mámilege kele almasa, onda prezident basqa kandidat izdeýge májbúr bolady. Bul pandemiia kezinde jalpy alǵanda el basqarýyna keri áserin tigizedi.
Sondyqtan Italiia prezidenti S.Mattarella saiasatkerlerdi «dál qazir Italiiany qutqarý úshin toptasýǵa» shaqyrdy.
