Italiia biligi Marina di Karrara portynda turǵan "Shaherezada" sýperiahtasyn tutqyndady. Bul keme Resei basshysy Vladimir Pýtinge tiesili dep aitylady.
Italiia biliginiń málimetinshe, qarjy politsiiasynyń tergeý nátijesinen keiin kemeniń "Reseidiń joǵary laýazymdy tulǵalary men Eýroodaq sanktsiiasyna ilingen adamdarǵa" qatysy bar ekeni anyqtalǵan. Habarlamada kemeniń naqty kimge tiesili ekeni aitylmaidy.
Táýelsiz baǵalaýshylardyń pikirinshe, shamamen 700 mln dollar turatyn 140-metrlik kemede birneshe ai boiy jóndeý jumystary júrgizilgen. Ol kelesi jyldyń basynda aiaqtalýy tiis bolǵan. New The York Times basylymynyń jazýynsha, osy aptada iahta keme jóndeitin orynnan ketip, teńizge shyǵýǵa daiyndalǵan. Alaida Italiia biligi ony kemege qatysty túpkilikti sheshim shyqqanǵa deiin porttan jibermegen.
Oppozitsiialyq saiasatker Aleksei Navalnyidyń jaqtastary zertteýlerinde keme Vladimir Pýtinge tiesili degen qorytyndy jasaǵan. Italiianyń La Stampa basylymy keme "Rosneft" kompaniiasynyń burynǵy basshysy Edýard Hýidanatovqa tiesili dep jazǵan. Britandyq Guardian basylymy derekkóziniń aitýynsha, sýperiahtanyń shynaiy iesin anyqtaý múmkin emes, sebebi ol kóptegen kompaniiamen bailanysty.
Keiingi aptalarda Eýroodaq aýmaǵyndaǵy porttarda Reseidiń Ýkrainaǵa basyp kirýine qarsy jariialanǵan sanktsiia aiasynda birneshe sýperiahta tutqyndalǵan. Kemeleri tutqyndalǵan reseilik milliarderler arasynda Aleksei Mordashov, Gennadii Timchenko, Álisher Osmanov, Viktor Vekselberg bar.
Sáýir aiynyń sońynda AQSh-ta Kremlmen bailanysty oligarhtardyń aktivterin kámpeskelep, odan túsken qarjyny Ýkrainaǵa gýmanitarlyq kómekke baǵyttaýdy qarastyratyn zań jobasy engizilgen.
