Foto: © pixabay.com
Italiianyń kóne qalasy Pompeide urlyq derekteri jii anyqtalady. Degenmen týrister bul jerden urlanǵan artefaktiler adamǵa baqytsyzdyq ákeledi dep senedi, - dep habarlaidy Tengritravel.kz portaly.
Jaqynda Pompei týristik mekeni direktorynyń atyna sálemdeme kelgen. Onyń ishinde tas pen belgisiz áieldiń haty bolǵan.
"Meniń qarǵys týraly habarym bolmady. Tastardy alýǵa bolmaitynyn bilmedim. Menen sút bezi qaterli isigi anyqtaldy", - delingen hatta.
Keiin hatty jibergen týrist buryn janartaý mańynan tasty kádesyi retinde úiine alyp ketkeni belgili boldy.
Wanted in Rome málimetinshe, Pompeiden tas urlaǵan áiel sút bezi obyryna shaldyqqanyn, onyń oǵan jamandyq ákelgenin aityp, qaitaryp bergen. Saiahatshy atap ótkendei, týristik mekennen oralǵannan keiin bir jyl ishinde odan onkologiialyq aýrý anyqtalǵan.
Pompei direktory Gabriel Tsýhtrigel qorqyp qalǵan týriske basý aitty.
"Qurmetti anonim, tas Pompeige jetkizildi. Bizdiń Italiiada In bocca al lupo deimiz, iaǵni biz aldaǵy ýaqytta sizge tek sáttilik tileimiz", - dep jaýap qaitardy ol.
Bul oqiǵa alǵash ret bolyp otyrǵan joq. Joly bolmai ketkenin aityp, óz áreketine ókinip, urlanǵan artefaktilerdi qaitarǵan týrister kóp eken. Tipti Pompeide keri qaitarylǵan zattardyń arnaiy kórmesi bar. Onda hattardyń kollektsiiasy da jinaqtalǵan. Zattardy keri qaitarǵandardyń bir bóligi jaǵymsyz energiiadan qutylǵysy keletinin aitsa, basqalary ózin urlyq jasaǵany úshin kináli sezinetinin moiyndaǵan.
Máselen úsh jyl buryn italiialyq úkimetke erekshe sálemhat kelgen. Onyń ishinde antesissanyń terrakotalyq fragmenti men hat bolǵan.
"50 jyl buryn ǵimarattan osy fragmentti sheship alyp edim. Men óz isime qatty uialamyn. Sol sebepti iesine qaitarý týraly sheshim qabyldadym. Keshirińiz", - dep jazǵan hat avtory.
Dál osyǵan uqsas jaǵdai 2020 jyly boldy. Kanadalyq týrist 15 jyl buryn qoldy etken artefaktilerdi qaitaryp, osylaisha "ózine jáne otbasyna tigen qarǵystan" qutqarmaq bolǵan.
Nikol esimdi áiel 2005 jyly arheologiialyq saiabaqqa barǵan kezde urlaǵan eki mozaikalyq plitkadan, iaǵni qysh ydystardan jáne amforanyń bólikterinen turatyn paketti keri qaitarǵan. Ol osy zattardy urlaǵannan soń, densaýlyǵy nasharlap, qarjylyq qiyndyqqa tap bolǵanyn aitqan.
"Men jas ári aqymaq boldym. Qolymda basqa eshkimde joq tarihtyń bir bólshegi bolsa dep oiladym...Eki ret sút bezi obyryna shaldyqtym. Eń aqyrynda mastektomiia jasaýǵa májbúr boldym. Meniń otbasymnyń qarjylyq jaǵdaiy nasharlady. Biz qarapaiym adamdarmyz. Men bul qarǵystyń otbasyma, balalaryma berilgenin qalamaimyn", - dedi ol.
Budan bólek kanadalyq týristen de qaraly habar kelgen. Kóptegen jyl buryn áiel bal aiy kezinde Pompeiden músindi urlap ketken kórinedi. Alaida jas jubailar úilerine oralǵanda, kúieýi júrek talmasynan qaitys bolǵan. Keiin onyń chemodanynan kishkentai músin anyqtalǵan.
