Foto: ansa.it
Italiianyń Lampedýza aralynda migranttar mingen qaiyq apatqa ushyrap, 41 adam mert boldy, dep habarlaidy QazAqparat agenttigi VVS-ge silteme jasap.
Apattan 4 adam aman qalǵan. Olar qutqarýshylarǵa qaiyqta barlyǵy 45 adam, sonyń ishinde úsh bala bolǵanyn aitqan.
Keme Týnistegi Sfaks qalasynan shyqqan. Birneshe saǵattan keiin aýdarylyp, sýǵa batyp ketken. Sfaks – Lampedýzadan shamamen 130 shaqyrym jerdegi portty qala. Týnis biliginiń aitýynsha, bul jerden migranttar qaýipsiz ómir izdep Eýropaǵa zańsyz attanady.
Aman qalǵan adamdardy Malta júk kemesi shyǵaryp alyp, Italiia jaǵalaý kúzetine tabystaǵan.
Keiingi eki kúnde italiialyq patrýldik kater men qaiyrymdylyq toptary Lampedýzaǵa kelgen 2 myńǵa jýyq adamdy qutqarǵan. Jeksenbi Italiianyń jaǵalaý kúzeti taǵy eki keme apatqa ushyrap, 30 adam iz-túzsiz joǵalǵanyn aitsa, dúisenbi kúni Týnis biligi Sfaks mańynda 11 adamnyń máiitin tapty. Italiia ishki ister ministrliginiń deregi boiynsha, jyl basynan Italiiaǵa teńiz arqyly 93700 zańsyz migrant kelgen. Byltyr osy kezeńde olardyń sany 44700 boldy.
