Italiianyń ońtústik-batysynda ornalasqan Kampaniia aimaǵynda maska taǵý týraly talapty saqtamaǵan tulǵalar men biznes ókilderine salynatyn aiyppul 1 myń eýroǵa deiin artty, dep habarlaidy The Local.
Salerno qalasyndaǵy bar men shashtaraz sekildi úsh mekemege jeksenbi kúni birinshi bolyp aiyppul salyndy. Olar juma kúni qabyldanǵan maskany jabyq mekemelerde taǵýdy talap etetin jarlyqty oryndamaǵany belgili boldy.
Jarlyqtyń negizgi sharalarynyń biri – jabyq mekemelerde, qoǵamdyq oryndarda, sýpermarketterde, barlarda, meiramhanalarda, dúkender men qoǵamdyq kólikte maska taqpaǵandarǵa 1 myń eýro mólsherinde aiyppul salý.
Erejege sáikes, kólik operatorlary maska taqpaǵan jolaýshylardy kirgizýge tyiym salýǵa mindetti. Eger mundai jolaýshylar kólikke minse, olarǵa aiyppul salynýy jáne kólikten túsirilýi tiis. Eger olar odan bas tartsa, «avtobýs nemese poezd toqtaidy» jáne «politsiianyń shaqyrylady». Eger quqyq buzýshylyq kommertsiialyq qyzmetti júzege asyrý kezinde jasalsa, kásiporyndar da jaýapqa tartylady.
1 myń eýro aiyppuldan bólek, biznes 5-ten 30 kúnge deiingi merzimge jabylýy múmkin.
Italiia – koronavirýstan qatty zardap shekken Eýropadaǵy alǵashqy el. Munda aýrý juqtyrǵan 242 000–nan astam jaǵdai tirkelgen, 35 myńnan astam adam qaitys bolǵan.
Ótken senbide elde koronavirýsqa shaldyǵýdyń 275 jańa deregi, bes ólim jaǵdaiy tirkeldi.
