Lombardiia men Venetodan Sitsiliia, Toskana men Ligýriiaǵa taraǵan koronavirýstan 11 adam qaitys boldy, dep habarlaidy ANSA agenttigi.
Premer-ministr Djýzeppe Konte eldiń bul daǵdarysqa qasqaia qarsy turyp, aman shyǵatynyn málim etti. Sonymen qatar ol koronavirýstyń taralýyna Lodi mańyndaǵy Kodono aýrýhanasynyń emdeýge qabiletsizdigi sebep bolǵanyn jetkizdi.
Seisenbi kúni baspasóz máslihaty kezinde Italiianyń Azamattyq qorǵanys qyzmetiniń basshysy Andjelo Borrelli koronavirýstan 11 adamnyń qaitys bolǵanyn habarlady.
Onyń aitýynsha, sońǵy birneshe saǵatta eldiń 80 jastaǵy úsh azamaty qaza tapqan.
Sonymen qatar, Trevizoda respiratorlyq aýrýdyń asqynýyna bailanysty emhanaǵa jatqyzylǵan 76 jastaǵy áiel koronavirýs juqtyryp, ómirden ozdy.
Borelli Italiiada 322 jańa virýs juqtyrý oqiǵasy tirkelgenin aitty. Sitsiliiada indet juqtyrǵandar úsheýge jetti.
Eń kóp zardap shekken aýdan – Lombardiia, ol aimaqta virýs 9 adamnyń ómirin qiyp, 240 adam dertke shaldyqty.
Seisenbi kúni úkimet alǵashqy koronavirýs juqtyrý oqiǵasy Ligýriia ákimshilik aýdanynda tirkelgenin habarlady.
Rimde seisenbide bolǵan baspasóz máslihaty kezinde Dúniejúzilik densaýlyq saqtaý uiymynyń ókili Ýolter Rikkardi Italiiada koronavirýs juqtyrǵandardyń 3%-y ǵana qaitys bolǵanyn málimdedi.
