Italiiada koronavirýstan kóz jumǵandar sany Qytaidan da asyp ketti, dep habarlaidy Euronews agenttigi.
Sońǵy táýlikte Italiiada atalmysh dertten 427 adam qaitys bolǵan. Sóitip aýrý órshigennen beri elde kóz jumǵandar sany 3405 boldy. Bul Qytaida qaza tapqandar sanynan 150 adamǵa kóp. Jalpy alǵanda, Italiiada 41 myń adam virýs juqtyrǵan. Sońǵy 24 saǵat ishinde 5322 adamnan virýs tabylǵan.
Qytai sarapshy dárigerleriniń sózinshe, Italiia biliginiń COVID-19 indetimen kúreske jumsaǵan kúsh-jigeri jetkiliksiz.
«Menińshe, Milanda qatań karantin sharalary da kómektespei jatyr. Qoǵamdyq kólik áli jumys istep tur, halyq qalada emin-erkin júr. Qonaq úide túrli keshter uiymdastyrylady. Sosyn sizder maska kimeisizder», - deidi Qytaidaǵy Qyzyl jarty ai uiymynyń ókili Sýn Shýopen.
Italiia halqy eki aptadan beri oqshaýlanyp ómir súrip jatyr. Bastapqyda karantin 3 sáýirge deiin dep josparlanǵan. Degenmen ol áli uzartylady. Onyń ústine, úkimet taǵy da qosymsha sharalar engizýge nietti. Atap aitqanda, halyqtyń taza aýada júrip-turýyna shekteý qoiylady.
Sonymen qatar, azyq-túlik dúkenderiniń demalys kúnderdegi jumys ýaqyty qysqarmaq. Memlekettik organdardyń kóbisi qashyqtan jumys isteýge kóship jatyr. Jumys istep turǵan bankter men poshtalarda qyzmetkerler sany azaiýda.
