يتالييادا كوروناۆيرۋستان كٶز جۇمعاندار سانى قىتايدان دا اسىپ كەتتٸ, دەپ حابارلايدى Euronews اگەنتتٸگٸ.
سوڭعى تەۋلٸكتە يتالييادا اتالمىش دەرتتەن 427 ادام قايتىس بولعان. سٶيتٸپ اۋرۋ ٶرشٸگەننەن بەرٸ ەلدە كٶز جۇمعاندار سانى 3405 بولدى. بۇل قىتايدا قازا تاپقاندار سانىنان 150 ادامعا كٶپ. جالپى العاندا, يتالييادا 41 مىڭ ادام ۆيرۋس جۇقتىرعان. سوڭعى 24 ساعات ٸشٸندە 5322 ادامنان ۆيرۋس تابىلعان.
قىتاي ساراپشى دەرٸگەرلەرٸنٸڭ سٶزٸنشە, يتالييا بيلٸگٸنٸڭ COVID-19 ٸندەتٸمەن كٷرەسكە جۇمساعان كٷش-جٸگەرٸ جەتكٸلٸكسٸز.
«مەنٸڭشە, ميلاندا قاتاڭ كارانتين شارالارى دا كٶمەكتەسپەي جاتىر. قوعامدىق كٶلٸك ەلٸ جۇمىس ٸستەپ تۇر, حالىق قالادا ەمٸن-ەركٸن جٷر. قوناق ٷيدە تٷرلٸ كەشتەر ۇيىمداستىرىلادى. سوسىن سٸزدەر ماسكا كيمەيسٸزدەر», - دەيدٸ قىتايداعى قىزىل جارتى اي ۇيىمىنىڭ ٶكٸلٸ سۋن شۋوپەن.
يتالييا حالقى ەكٸ اپتادان بەرٸ وقشاۋلانىپ ٶمٸر سٷرٸپ جاتىر. باستاپقىدا كارانتين 3 سەۋٸرگە دەيٸن دەپ جوسپارلانعان. دەگەنمەن ول ەلٸ ۇزارتىلادى. ونىڭ ٷستٸنە, ٷكٸمەت تاعى دا قوسىمشا شارالار ەنگٸزۋگە نيەتتٸ. اتاپ ايتقاندا, حالىقتىڭ تازا اۋادا جٷرٸپ-تۇرۋىنا شەكتەۋ قويىلادى.
سونىمەن قاتار, ازىق-تٷلٸك دٷكەندەرٸنٸڭ دەمالىس كٷندەردەگٸ جۇمىس ۋاقىتى قىسقارماق. مەملەكەتتٸك ورگانداردىڭ كٶبٸسٸ قاشىقتان جۇمىس ٸستەۋگە كٶشٸپ جاتىر. جۇمىس ٸستەپ تۇرعان بانكتەر مەن پوشتالاردا قىزمەتكەرلەر سانى ازايۋدا.
