Foto: travelpress.kz
Italiiada qazaqy oiý-órnek pen kiiz úi elementterimen jasalǵan «Yurt» atty kiimder toptamasy jaryq kórdi, dep habarlaidy Ult.kz Travelpress.kz saityna silteme jasap.
Brend negizin qalaýshylar Qazaqstanǵa kelip, eldiń tanymal týristik oryndarynda foto jáne beine túsirilimder júrgizgen.
«Milang» atty italiialyq kiim brendi qazaq simvolikasymen bezendirilgen alǵashqy erler toptamasyn usyndy. Brendtiń negizin qalaýshy – Eýropada uzaq ýaqyt boiy turyp jatqan qazaqstandyq azamat. Ol bir jylyn tek sán úrdisterin ǵana emes, óziniń týǵan jeriniń tereń mádeni tamyryn kórsetetin kontseptsiia jasaýǵa arnaǵan.
Italiialyq dizainerdi shabyttandyrǵan keń dala, dástúrli oiýlar men erkindik pen jailylyq simvoly bolǵan kiiz úidiń atmosferasy. Toptama ómir salty, saiahat pen tabiǵatpen úilesim arasyndaǵy bailanysty beineleýge baǵyttalǵan.
«Alǵashqy toptama – túp-tamyrǵa degen qurmet. Yurt – bul Qazaqstannyń tarihy. Ol dizain, tekstýralar men tabiǵat palitrasy arqyly baiandalady. Toptamaǵa dástúrli qazaq oiý-órnekteri, aǵash pen kiiz úi bólikterindegi kóne naqyshtardan shabyt alǵan elementter kiredi. Kiimdegi kesteler men sándik tigister kóshpendilerdiń simvoldyq syzyqtaryn qaitalaidy, al matalardyń faktýrasy dala halyqtarynyń dástúrli kiimderinde qoldanylǵan tabiǵi materialdardy eske salady. Árbir detal ǵasyrlar boiǵy dástúrler men zamanaýi stil arasyndaǵy bailanysty kórsetedi. Kiiz úi siiaqty, biz de Gýzal Normatovamen birlesip, ónimderdi tek tabiǵi materialdardan – kashemir, jibek, maqta jáne tabiǵi múiizden jasalǵan fýrnitýradan ázirledik. Bul kiimderge erekshe sapa berip, olardyń tabiǵatpen tereń bailanysyn aiqyndaidy», – dep atap ótti «MILANG» brendiniń negizin qalaýshy Vitalii Lang.
Kazakh Tourism men Creative Innovation Institute bul jobany Qazaqstandaǵy túsirilimder – «Shymbulaq» taý-shańǵy kýrortynda jáne «Sharyn» ulttyq parkinde ótkizýge qoldaý kórsetti.
«Biz árdaiym Qazaqstannyń tabiǵi jáne mádeni bailyǵyn halyqaralyq indýstriialar prizmasy arqyly nasihattaityn jobalardy qoldaýǵa qýanyshtymyz. «Yurt» toptamasy bizdiń tabiǵatymyz ben dástúrlerimizdiń álemdik sánge shabyt bere alatynyn kórsetedi», – dep atap ótti Kazakh Tourism basshysy Qairat Sádýaqasov.
