Foto: QR MAM
Rimdegi Villa Gratsioli saiabaǵynda (Parco di Villa Grazioli) qazaq halqynyń uly aqyny ári oishyly Abai Qunanbaiuly biýstiniń saltanatty ashylýy ótti, dep habarlaidy Ult.kz.
Is-sharaǵa QR Mádeniet jáne aqparat ministri Aida Balaeva, Qazaqstan Respýblikasynyń Italiia Respýblikasyndaǵy Tótenshe jáne Ókiletti Elshisi Erbolat Sembaev, italiialyq ziialy qaýym ókilderi men Qazaqstannyń resmi delegatsiiasy músheleri qatysty.
Ministr saltanatty is-sharada sóilegen sózinde Abai Qunanbaiuly – qazaq halqynyń rýhani kemeldenýine baǵdar bolǵan, adamzattyń asyl murattaryn nasihattaǵan uly tulǵa ekenin atap ótti. Onyń shyǵarmalaryndaǵy basty ideia – adamgershilik, ádildik, bilim men eńbek arqyly izgilikke úndeý.
Sondyqtan da Abai beinesiniń dál Rim qalasynda boi kóterýi – mádenietter men órkenietter arasyndaǵy rýhani kópirdiń belgisi bolary anyq.
«Keiingi jyldary memleketterimiz arasyndaǵy qarym-qatynas erekshe serpin aldy. Ótken jyly Qazaqstan Respýblikasynyń Prezidentiniń Italiiaǵa resmi sapary men Italiia Ministrler keńesiniń tóraiymy Qazaqstanǵa jasaǵan resmi sapary yntymaqtastyqty jańa deńgeige kóterdi. Al qyrkúiek aiynda Italiia Prezidenti Qazaqstanǵa kelip, jańa bailanystarǵa jol ashyp, birqatar mańyzdy kelissózder jasaldy. Búgingi Abai eskertkishiniń ashylýy – sol kelisimderdiń kórinisi, eki halyq arasyndaǵy dostyq pen ózara qurmettiń belgisi dep bilemin», – dedi Aida Balaeva.
Aita ketsek, qazaqtyń uly aqyny Abaidyń esimi shetelde zor qurmetke ie. Aqynǵa arnalǵan eskertkishter, biýster men monýmentter álemniń kóptegen iri qalalary men astanalarynda ornatylǵan.
Olardyń qatarynda, Tashkent, Máskeý, Qazan, Bishkek, Beijiń, Kair, Býdapesht, Tegeran, Ankara, Ystambul, Niý-Deli, Jeneva, Parij, Renn, Saraevo, Tbilisi, Berlin, Seýl, Harkov, Baký jáne Rio-de-Janeiro qalalary bar.
Aida Balaeva men Erbolat Sembaev Shyńǵys Aitmatov eskertkishine gúl shoqtaryn qoidy.
