Portýgaliiada jaýyn-shashyn jaýmaǵandyqtan, sońǵy 20 jylda bolmaǵan qurǵaqshylyq tirkeldi. El biligi osyǵan bailanysty jedel sharalar qabyldap jatyr, dep habarlaidy QazAqparat euronews agenttigine silteme jasap.
El ortalyǵyndaǵy sý qoimalary qurǵap jatyr, fermerler men jergilikti halyq alańdaýly. Zezere ózeniniń jaǵalaýy tartylyp qaldy. Eldegi elektr energiiasynyń 30%-y sý elektr stantsiiasynda óndiriledi, qazirgi kezde bes stantsiiadaǵy óndiris toqtap tur.
Budan buryn atalǵan aýdan 2017 jyly bolǵan orman órtiniń zardabyn shekken.
Sonymen qatar qurǵaqshylyqtan kórshiles Ispaniia da zardap shegýde. Qańtar aiynda bul elde jaýyn-shashyn normasynyń tórtten biri ǵana jaýdy. Keibir aýdandarda aýyl sharýashylyǵynyń qajettiligine arnalǵan rezervýarlarda sý tapshylyǵy baiqalady, olar 45%-ǵa ǵana tolǵan. Galisiia provintsiiasynda sý qoimasynyń astynda ótken ǵasyrda sýǵa batqan aýyl kórine bastady.
Ǵalymdardyń aitýynsha, bul qurǵaqshylyq – klimattyń ózgerýi saldarynyń biri.
Meteorologtar jaqyn kúnderi jaǵdai jaqsarmaitynyn eskertti. Portýgaliia men Ispaniia úkimetteri daǵdaryspen kúresý úshin kúsh biriktirýge uiǵardy.
