Biznesti basqarýdaǵy qatelikter, naryqqa shyǵýdyń qiyndyǵy, seriktes tabýdaǵy kedergiler, senimsizdik, kadrlar tapshylyǵy – elimizdiń biznes salasyndaǵy basty problemalar. Osyndai túitkildi máselelerdiń túiinin tabý úshin Qazaqstanda ashyq tsifrlyq platforma júzege asyrylýda. Onyń negizgi maqsaty –shaǵyn jáne orta kásipkerligin qoldap, damytý. Bul aitýly joba «Qazaqtelekom» AQ-nyń bastamasymen biylǵy jyldyń tamyzynan bastap júzege asýda.
Atalǵan ashyq tsifrlyq alań Ismet.kz degen ataýǵa ie. Búginde bul portal kásipkerler qaýymyna óz qyzmetterin usynýda. Máselen, marketing, elektrondy saýda, onlain qujat ainalymy, keden protsedýralary, kadrlyq máseleler, sýbsidiialaý, nesie alý, aýdit, bultty býhgalterlik esep pen apparattyq kassalyq esep jáne basqa bizneske qajet qyzmetter.
Ismet.kz-tiń basty ereksheligi nede?
Búginde elimizde kásipkerlerdi qoldaityn 20-dan astam ártúrli ortalyqtar bar. Degenmen, shaǵyn jáne orta kásipkerlikke arnalǵan ashyq tsifrlyq platforma (Ismet.kz) – barlyq resýrstardy bir ortalyqqa shoǵyrlandyra alýymen erekshelenip otyr. Iaǵni, «bir tereze» printsipi boiynsha jumys isteýde. Qyrkúiek aiynan bastap 1300-den astam kompaniia tirkelgen. Bolashaqta 370 myń kásipkerdi tartý kózdelýde. Atalmysh platformanyń aiasynda otandyq taýar shyǵarýshylardyń ónimderin eksportqa shyǵarý jeńildei túsedi eken.
Álemde qandai tsifrlyq alańdar bar? Olardyń eń úzdikterine qai kompaniialar jatady?
Accenture júrgizgen zertteýlerge sáikes, dástúrli jáne shaǵyn kásipkerlikte tsifrlyq platformamen jumys isteý áleýeti joǵary deńgeidi kórsetip otyr. Alaida solardyń 10 paiyzy ǵana jaqyn arada tabysty bolady dep boljanýda. Sondai-aq, 2020 jylǵa qarai ekonomikalyq platforma boiynsha Qytai, Úndistan jáne AQSh memleketteri úzdikterdiń qatarynan kórinedi eken. Agenttiktiń zertteýinshe, Fortune tizimindegi kompaniialardyń 15 paiyzy ózderiniń biznes-modelderin tsifrlyq platformanyń negizinde 100 paiyz deńgeiinde damytyp otyr. Búgingi tańda álemdik arenada tsifrlyq platformaǵa kóshken kompaniialar legi artyp keledi. Solardyń ishindegi alpaýyt kompaniialar – amerikalyq Amazon men qytailyq Alibaba kompaniialary. Osynyń arqasynda olardaǵy biznes-model óte joǵary deńgeide damyǵan. Kompaniialardyń tabysy artyp, olardyń damýyna barlyq jaǵdai jasalǵan. Buǵan qosa, koreialyq Bizmeka kompaniiasy men singapýrlyq Mybusiness kásiporny da tsifrlyq platforma boiynsha jumys isteitin úzdik kompaniialardyń qatarynan kórinip otyr. Bizmeka, Mybusiness, Alibaba jáne Amazon kompaniialarynyń tsifrlyq platformasynyń maqsaty – taýarlar satýǵa, marketing, jetkizýshilerdi izdestirý, býhgalterlik esep jáne logistika salasynda qajetti qyzmetterdi bir ortalyqtan alýǵa jaǵdai jasaý.
Qazaqstandaǵy tsifrlyq platformanyń jaǵdaiy
Al otandyq sarapshylar qaýymy bolsa Qazaqstan biznesiniń tsifrlyq platformaǵa kóshýi taýarainalymdy 30 paiyzǵa arttyrady deidi. Sonymen qatar, iskerlik belsendiliktiń artýyna da jaǵdai jasaidy. Tsifrlyq platformany qurý shaǵyn jáne orta bizneske tsifrlyq ekonomikaǵa tezirek kóshýge yqpal etedi. Ári kompaniialardyń jergilikti jáne halyqaralyq naryqqa shyǵýyna arqaý bolady. Mundai aýqymdy jobany júzege asyrý otandyq AKT salasyn damytýǵa serpin beretin bolady. Atalǵan tsifrlyq platforma – biznes qaýymdastyqtaǵy oqiǵalar men jańa trendter týraly ShOB ókilderine habardar etetin kommýnikatsiialyq alań sanalady.
Tsifrlyq platforma memleket pen biznes-elitaǵa ne beredi?
Memleket úshin: elektrondyq saýda damidy; ekonomikalyq áleýet artady; áleýmettik ál-aýqat artyp, jumyssyzdyq joiylady; eldegi shaǵyn jáne orta biznes damidy; elektrondyq qyzmetter men memlekettik qyzmetter jaqsara túsedi; jańa naryq kózderi ashylady; AKT dami túsedi.
Biznes-qaýymdastyq úshin: kompaniia tabysy artady; jergilikti jáne jahandyq naryqqa shyǵa alady; marketingtik qyzmetterdi tegin alady; kásipkerlikke bailanysty saýattylyǵyn arttyra alady; seriktes tabýǵa járdemdesedi; analitikalyq qyzmetter alady; qyzmetterdi tez ári yńǵaily alatyn bolady; memlekettik qyzmet qoljetimdi bolady ári memlekettik qoldaýǵa ie bolady; arnaiy alań arqyly tolǵandyrǵan saýaldardy talqylai alady.
