Ózbekstan bas prokýratýrasy Gúlnara Karimovanyń qamaýǵa alynǵanyn habarlady, dep jazady "Ult aqparat" tilshisi Azattyqqa silteme jasap.
Ózbekstannyń burynǵy prezidenti Islam Karimovtyń úlken qyzy qamaýǵa alynǵan. Oǵan qylmystyq kodekstiń alty baby boiynsha aiyp taǵylǵan (168, 178, 182, 189, 228, 243). Habarlamada Karimovanyń qai ýaqyttan bastap qamaýda otyrǵany jazylmaǵan.
Prokýratýranyń habarlaýynsha, "Karimovanyń memleket pen jeke azamattarǵa keltirgen shyǵyn kólemi 1 trillion 270 milliard 200 million som, 1 milliard 651 million dollar, 26,1 million eýrony quraidy. Tergeý materialdaryna sai Karimova 12 shetel territoriiasynda zańsyz jolmen 1 milliard 394 million dollar, 63,5 million eýro, 27,1 million fýnt, 18,5 million frankqa teń aktivter ielengen".
Prokýratýra Gúlnara Karimova Shvetsiia, Shveitsariia, BAÁ, Malta, Gonkong, Ulybritaniia, Germaniia, Frantsiiada aktivteri men jyljymaityn múlikteri, ushaqtary bolǵanyn málimdedi. Ózbekstan halyqaralyq zańdarǵa sai sheteldik organdarǵa qylmystyq toptyń aktivterine arest qoiý týraly ótinish jibergeni de habarlandy.
Prokýratýranyń málimdemesinde Gúlnara Karimova 2015 jyly bes jylǵa bas bostandyǵynan aiyrylǵany, onyń ústinen ekinshi ret qylmystyq is qozǵalǵap jatqany jazylǵan.
Bir kezderi ákesi Islam Karimovtyń eń yqtimal murageri sanalǵan Gúlnara Karimova korrýptsiialyq janjalǵa shatylyp, 2014 jyly Ózbekstandaǵy media resýrstarynan aiyrylǵan. Karimova 2014 jyldan beri úiqamaqqa alynyp, korrýptsiialyq qylmysqa qatysty tergelip jatqany habarlanǵan.
