Búginde COVID-19 koronavirýs juqpaly derti álem jurtshylyǵyn alańdatyp otyr. Dúniejúzilik densaýlyq saqtaý uiymynyń álemdi sharpyǵan juqpaly dertti pandemiia dep jariialaýyna bailanysty Qazaqstan Respýblikasynyń barlyq aýmaǵynda 2020 jyldyń 16 naýryzynan bastap 30 táýlikke tótenshe jaǵdai engizildi.
Qazaqstan musylmandary dini basqarmasy tótenshe jaǵdaida meshitte juma jáne bes ýaqyt namaz oqýǵa qatysty pátýa shyǵardy, dep habarlaidy "Ult aqparat".
«Islam dini keibir ǵibadattardy qaýipti jaǵdailarda ýaqytsha toqtatýǵa ruqsat beredi. Mysaly, adamnyń ómirine, densaýlyǵyna, mal-múlkine, bala-shaǵasy men otbasy múshelerine áldebir zalal tietin bolsa, shariǵatymyz onyń meshitke kelip, bes ýaqyt namazdy jamaǵatpen oqýyn, tipti juma namazǵa qatysýyn mindettemeidi», - delingen dini basqarma aqparatynda.
Osy rette Qazaqstan musylmandary dini basqarmasynyń Ǵulamalar keńesi elimizde jariialanǵan tótenshe jaǵdaidy eskere kele, koronavirýstyń jamaǵat arasynda taralýynyń aldyn alý sharasyna qatysty mynadai málimdeme jasady.
Birinshiden, memleket tarapynan elde tótenshe jaǵdai jariialanýyna jáne indettiń taralý qaýpi joǵary bolýyna bailanysty meshitterde juma namazy ýaqytsha oqylmaidy. Árkim óz úiinde juma namazdyń ornyna besin namazyn óteidi.
Ekinshiden, meshitter jabylmaidy, bes ýaqyt namazǵa azan shaqyrylady, alaida bes ýaqyt namaz meshitte jamaǵatpen oqylmaidy.
Úshinshiden, meshit janyndaǵy ashanalarda ótetin qudaiy as, sadaqalar (jetisi, qyrqy, jyly t.b. dástúrli kádeler) ýaqytsha toqtatylady.
Tórtinshiden, janaza namazyn tek jaqyn týystarymen, iaǵni az toppen ótkizgen durys.
Qazaqstan musylmandary dini basqarmasy musylman qaýymyn sabyr saqtaýǵa, orynsyz úreilenbeýge, halyqty dúrliktirmeýge jáne Alla Taǵalaǵa duǵa etýge shaqyrady.
