Parlament Májilisiniń depýtaty Qaraqat Ábden memleket jáne qoǵam qairatkeri Anar Jaiylǵanovany qaiǵyra eske alyp, áleýmettik jelide jazba arnady. Memlekettik qyzmet isteri agenttiginiń eks-tóraǵasy Anar Jaiylǵanova 55 jasqa qaraǵan shaǵynda mezgilsiz dúnieden ótti. Qaraqat Ábden qyzmet barysynda marqummen jaqyn aralasyp, dostasyp úlgergenin aitady.
"Sońǵy úsh kúnniń maǵan áseri bólek boldy. Anar Nuráliqyzy meniń qurbym, jaqyn tutqan jan edi. Dostyqqa adal, ýádege berik, adamgershilikten attap baspaityn keremet tulǵa bolatyn. Onyń saiasi qairatkerligi, memlekettik qyzmetker retinde kásibiligi, maman retinde sheber iskerligi bir tóbe, adamdyǵy bir tóbe edi. Meniń aitpaǵym basqa, onyń jany - názik, emotsiiasy shynaiy, bárin júrekpen qabyldaityn kirshiksiz kóńili tereń edi. Oqiǵany, qubylysty, adamdardy erekshe jaqyn tutyp, jadyǵa saqtaityn. Sondai-aq onyń iske berilgen muqiiattylyǵy, patriottyq sezimi bólek áńgime. Qyzmetke adaldyq, janqiiarlyq jaýapkershilik dese, úlgi etip Anar Nuráliqyzyn aitýǵa bolar edi?! Amal neshik, ótken shaqta ǵana eske alamyz. Qyrshynnan qiylǵan jas ǵumyr. Nebári 55 jas. Áielge tán ádemilik, náziktik osy asyl qurbyma tán bolatyn. Ókinishti. Artta ańyrap balalar qaldy, qansha atqarylmaǵan ister qaldy, oryndalmaǵan arman-maqsat qanshama?"- dep jazdy Qaraqat Ábden.
Osydan keiin depýtat oqyrmandarǵa ómirdiń qas-qaǵym sátte ótip ketetinin taǵy bir eske saldy. Erteń kún týa ma, týmai ma belgisiz?! Sondyqtan baqytty shaqtardy qazir sezinip, búgingi kúnniń ǵajaiybyn dál qazir seziný kerek, dep keńes berdi.
"Qyzmet te, mansap ta bári ótkinshi. Sondyqtan bul jalǵandaǵy qysqa ǵumyrdy meilinshe ózimizge, otbasymyzǵa qundy qylyp ótkizsek?! Jaǵymsyz jaittardy júrekke jazbai, ýaqyt enshisine qaldyrý kerek!
Júrektegi jan syrym osylai syr shertti. Anar qurbymnyń asyl beinesi esimizde saqtalady. Onyń jumsaq úni pen kelisti kelbeti jadymyzda qattaýly. Baqul bol, aiaýly dos, myqty áriptes Anar Nuráliqyzy!" - dep aiaqtady jazbasyn Qaraqat Ábden.
