Túrkiianyń «Işiklar Holding» kompaniiasy Túrkistanda iri óndiris ornyn ashýǵa nietti, dep habarlaidy «Ult aqparat» oblys ákimdiginiń baspasóz qyzmetine silteme jasap.
Búgin Túrkistan oblysynyń ákimi Darhan Satybaldy atalǵan kompaniia basshylarymen onlain rejimde kelissóz júrgizip, jobalardy talqylady. Kelissózge «Işiklar Holding» kompaniiasynyń bas direktory Volkan Girishken men «Işiklar Paper Sack Co. Ltd.» kompaniiasynyń bas direktory Hýsein Oka jáne Qazaqstannyń Túrkiiadaǵy elshisi Erkebulan Sapiev te qatysty. Oblys ákimi Túrkistanda investorlarǵa qolaily jaǵdai jasalatynyn jetkizdi.
«Túrkistan qalasynyń keleshegi jarqyn. Aýqymdy josparlar bar. Arnaiy ekonomikalyq aimaqta investolarǵa qolaily jaǵdai jasaimyz. Odan óndiristi damytý baǵytynda kóptegen ister atqarylady. Ásirese túrki memleketterinen keletin kásipkerler óńirimizde jemisti jumys istep jatyr. «Işiklar Holding» kompaniiasynyń usynysyn qoldap, birlese jumys isteýge, budan da bólek óndiris oryndary boiynsha áriptestik ornatýǵa daiynbyz», – dedi Darhan Satybaldy.
«Işiklar Holding» kompaniiasynyń bas direktory Volkan Girishken Túrkistandaǵy braýnfild aýmaǵynda qurylys materialdaryna arnalǵan qaptamalar shyǵaratyn zaýyt ashýǵa nietti ekenderin jetkizip, jobany tanystyrdy. Investor Túrkistandaǵy jobaǵa 12 mln. AQSh dollary kóleminde investitsiia salýdy josparlap otyr. Jobanyń birinshi kezeńinde 5 mln. dollar kóleminde investitsiia salyp, 50 adamdy jumyspen qamtý kózdelgen. Kelissózder sátti aiaqtalyp, infraqurylym men jer ázirlense, joba 2023-2024 jyldary júzege aspaq.
Oblys ákimi Darhan Satybaldy túrkiialyq investorlardy Túrkistanǵa shaqyrdy. Sol kezdesýde eki tarap máseleni jan-jaqty talqylap, tiisti kelisimderdi qarastyrady.
«Işiklar Holding» kompaniiasy 1974 jyly himiia, agroónerkásip, energetika jáne ekonomikanyń basqa da salalarynda óz qyzmetin júrgizetin kompaniialar toby retinde qurylǵan. Búginde atalǵan kompaniia álemniń 50-den astam eline óz ónimderin eksporttap otyr.
