Qazaqstan Respýblikasy Aýyl sharýashylyǵy ministrligi ishki naryqtyń azyq-túlik taýarlarymen qamtamasyz etilýine júieli negizde monitoring júrgizetinin habarlady.
Vedomstvo málimetinshe, azyq-túlik qaýipsizdigi, sondai-aq respýblikanyń aýyl sharýashylyǵy qurylymdarynyń úzdiksiz jumysy máselesi turaqty baqylaýda.
"Jedel derekter boiynsha respýblika boiynsha barlyǵy 1,5 mln tonna áleýmettik mańyzy bar azyq-túlik taýarlarynyń qory bar. Onyń ishinde un – 145,1 myń tonna, qant – 47,6 myń tonna, kúrish – 40,2 myń tonna, makaron – 21,3 myń tonna jáne 1 mln tonna kókónis ónimderi jáne t. b.
Azyq-túlik ónimderin óndirý toqtatylmaidy, qorlar júieli negizde tolyqtyrylady. Jarma, un, konserviler jáne basqa da taýarlar óndirisi úshin jetkilikti shikizat, sondai-aq et jáne sút ónimderin óndirý úshin jetkilikti mal basy bar" - delingen habarlamada.
Kóptegen jyldar boiy Qazaqstan astyq pen undy álemdik naryqqa shyǵarý jáne jetkizý boiynsha jetekshi orynǵa ie bolyp keledi.
QR Ulttyq statistika biýrosynyń resmi derekterine sáikes, 2022 jylǵy 1 aqpandaǵy jaǵdai boiynsha respýblika boiynsha dándi jáne dándi-burshaqty daqyldardyń qory 10 mln tonnany quraǵan.
"Respýblika boiynsha barlyǵy 8,1 mln tonna bidai bar (onyń ishinde 6,7 mln tonna azyq-túlik jáne 0,3 mln tonna jemshóp), 1,2 mln tonna arpa, dándik júgeri - 157 myń tonna, qara bidai - 26 myń tonna.
Osylaisha, respýblika ishki naryqtyń astyqqa qajettiligin óz óndirisi esebinen tolyq kólemde qamtamasyz etýge qabiletti.
Jergilikti atqarýshy organdardyń derekteri boiynsha 2022 jylǵy 4 naýryzdaǵy jaǵdai boiynsha 47,6 myń tonna qant bar (turaqtandyrý qorlarynda – 3,7 myń tonna, saýda obektilerinde – 26,7 myń tonna, kásiporyndarda – 11,2 myń tonna, qoimalarda 5,8 myń tonna).
Sonymen qatar, Eýraziialyq ekonomikalyq komissiia Keńesiniń 2021 jylǵy 2 jeltoqsandaǵy № 140 sheshimimen Qazaqstan Respýblikasyna 2022 jyldyń 31 tamyzyna deiingi merzimge tariftik jeńildikterdi qoldaný arqyly 250 myń tonna kóleminde aq qant pen qant shikizatyn ákelý quqyǵy berildi" - dep tolyqtyrdy ministrlik.
Qazirgi ýaqytta EEK Keńesiniń sheshimin iske asyrý úshin Qazaqstan Respýblikasy Aýyl sharýashylyǵy ministriniń buiryǵymen aq qant pen quraq shikizaty qantyn ákelýge kvotalardy bólý qaǵidalary men tártibi bekitilgen.
Sonymen qatar, Aýyl sharýashylyǵy ministrligi AÓK damytýdyń 2021-2025 jyldarǵa arnalǵan ulttyq jobasy aiasynda importty almastyrý boiynsha júieli jumys júrgizip jatyr. Neǵurlym importtalatyn pozitsiialar aiqyndaldy, olardyń árqaisysy boiynsha naqty investitsiialyq jobalar iske asyrylyp jatyr. Mejelengen maqsatqa qol jetkizý úshin birqatar memlekettik qoldaý sharalary, onyń ishinde jeńildikpen kreditteý, sýbsidiialaý, jer resýrstary, infraqurylym, sondai-aq ishki naryqty qorǵaý jónindegi sharalarmen qamtamasyz etý boiynsha júzege asyrylady.
