QR Energetika ministrligi elimizdiń ishki naryǵynda benzin tapshylyǵy joq ekenin málimdedi, dep habarlaidy ministrlik baspasóz qyzmeti.
«2020 jyldyń qańtarynda benzin óndirýdiń josparly kólemi 415,7 myń tonnany qurap otyr. Al tutyný kólemi 340 myń tonna deńgeiinde bolady dep kútilýde. 20 qańtardaǵy jaǵdai boiynsha, Ai-92 markaly benzininiń jiyntyq qory 247 myń tonnaǵa jetti. Bul kórsetkish biylǵy 5 qańtardaǵy qaldyqpen salystyrǵanda 40 myń tonnaǵa artyq. Qaldyqtardyń qazirgi deńgeii ishki naryq qajettilikterin jabý úshin 20 kúnge jetkilikti», - delingen ministrlik baspasóz qyzmetiniń aqparatynda.
Ministrlik málimetinde, otyn boiynsha qordyń atalǵan kólemi qolaily deńgeide. Barlyq úsh munai óńdeý zaýyty shtattyq rejimde jumys isteýde.
«Benzin óndirý kólemi ishki naryq qajettigin tolyqtai jabýǵa múmkindik berip otyr. Sondyqtan Qazaqstannyń ishki naryǵynda otyn tapshylyǵy joq ekenin senimdi aitýǵa bolady», - delingen ministrlik habarlamasynda.
Aita keteiik, 2015 jáne 2016 jyldary sáikesinshe benzin men dizel otynyna memlekettik retteý toqtatyldy. Osy arqyly, janar-jaǵarmai baǵasy suranys pen usynys negizinde qalyptasýda, iaǵni naryqpen rettelip keledi.
