Qazaqstannyń ishki naryǵy munai ónimderimen tolyq qamtamasyz etildi. Bul týraly Úkimet otyrysynda QR Energetika ministri Nurlan Noǵaev aitty, dep habarlaidy QazAqparat.
«Munai ónimderin óńdeý 2020 jyldyń qańtar-shilde ailarynyń qorytyndysy boiynsha 6,4 mln tonnany qurady. Búginde munai ónimderin óńdeý esepti jyldyń josparymen salystyrǵanda ósim kórsetýde. Iaǵni, avtobenzin 2,5 mln, dizel otyny 2,5 mln, áýe otyny 253 myń, mazýt 1,4 mln tonna óndirildi. Bitým óndirisi 539 myń tonnany nemese ótken jyldyń jeti aiymen salystyrǵanda 116,7 paiyzdy qurady», -dedi ol.
Osy rette ministr munai ónimderin óńdeý kórsetkishiniń artýyna ne sebep bolǵandyǵyn túsindirip ótti.
«Munai óńdeý zaýyttaryn jańǵyrtýdyń nátijesinde munaidy tereń óńdeý qamtamasyz etildi. Búgingi tańda ishki naryq munai ónimderimen tolyq qamtamasyz etilgen»,- dedi Nurlan Noǵaev.
