"Qazaqstan sý sharýashylyǵynyń" burynǵy direktory, ózin-ózi atyp óltirgen Ómirbek Jampozovtyń ulyna prokýrorǵa shabýyl jasaǵany týraly aiyp taǵylǵan joq, dep habarlaidy Qazaqstan IIM memlekettik til jáne aqparat departamentiniń direktory Almas Sádýbaev.
Budan buryn habarlanǵandai, 32 jastaǵy Asyljan Jampozovqa qatysty prokýrorǵa qarsy kúsh qoldanǵany úshin QR QK 380-baby 1-bóligi boiynsha qylmystyq is qozǵalǵan bolatyn.
Asyljan bul jaiynda áleýmettik jeliden oqyp bilipti. Onyń aitýynsha, ákesiniń máiitine jaqyndaǵysy kelgende, quqyq qorǵaýshylar qolyn qaiyryp ustap, jibermei qoiǵan. Sonymen birge, Jampozovtyń uly bázbireýlerdiń qoqan-loqqy jasap júrgenin de aitqan bolatyn.
IIM ókili óz málimdemesinde marqumnyń ulyna qysym kórsetilip jatqanyn joqqa shyǵardy.
"Qazirgi ýaqytta BAQ-da biyl 20 shildede kópshilikke belgili jaǵdaida kóz jumǵan Jampozov Ómirbek Asyqbekulynyń balasy — Jampozov Asyljanǵa quqyq qorǵaý organy tarapynan qysym kórsetilgeni týraly aitylyp júr", — dep atap ótti IIM ókili.
Onyń sózine súiensek, Jampozov Asyljan 2017 jyly 20 shildede oqiǵa ornyn qaraý barysynda Tselinograd aýdany prokýrorynyń ishinen aiaǵymen bir tepken. Sol jerde aýdan prokýroryn óltiremin dep te ses kórsetipti. Jedel tergeý toby músheleri men basqa da resmi ókilder bul oqiǵanyń kýási bolǵan, dedi Sádýbaev.
Sádýbaevtyń aitýynsha, "jerleý rásimine bailanysty Jampozov Asyljanǵa qatysty sotqa deiingi sharalar keiinge qaldyrylǵan".
"Is boiynsha Jampozov Asyljannyń statýsy áli anyqtalǵan joq, eshqandai aiyp ta taǵylmaǵan", — deidi IIM resmi ókili.
Qazirgi ýaqytta sotqa deiingi tergeý ádil júrýi úshin is derekterin QR IIM óndirisine jiberý máselesi qaralýda.
