Almatydaǵy Almasiti shaǵynaýdany Altyn Ordadaǵy úide qurylysshy kishkentai uldy úiine aldap kirgizip, zorlamaq bolǵan. Sol úidiń turǵyndary kúdiktini tergeý izoliatorynan bosatyp jibergenine narazy.
Stan.kz jazýynsha, 20 sáýirde kúndiz almatylyq Kamila Tileýqabylqyzynyń uly 1-2 saǵatqa dalaǵa oinaýǵa shyqqan. Bir top bala oinap jatqan kezde jandaryna er adam kelgen. Aitýlarynsha, ol – osy jerge qurylys isteýge kelgen Qaraqalpaqstan azamaty. 45 jastaǵy er adamnyń 7 balasy bar eken.
"Er adam balalarǵa túrli suraqtar qoiǵan, sózge tartqan. Basqa balalar tarap jatqanda, meniń ulymdy alyp qalyp, kómek surapty. “Qoqystardy tógýge kómektesshi” dep úiine kirýdi suraǵan. Ol maǵan da qolǵabys etip júrgendikten, oǵan da kómek berýge kelisken. Nege kirdiń dep surasam, “kómektespesem, urysa ma dep oiladym” deidi. Onyń ústine áńgime arasynda “men sport sheberimin, uryp tastaimyn” depti", – deidi balanyń anasy.
Úige kirgen kezde “belim aýyryp qaldy” dep, baladan massaj jasap berýin ótingen. Bala arqasyn ýqalap jatqan kezde er adam ony tartyp, uldyń qolyn óziniń ish kiimine salǵan. Baqytyna orai, bala aiqaiǵa basyp, teýip, qashyp úlgergen.
"Balam kirip kelgende, “qaida joǵalyp kettiń?” desem, kózi baqyraiyp, alańǵasarlanyp, jylaǵysy kelip tur. Tóbelesip qaldyń ba, ne boldy dep suraǵanymda, dirildep tur. Qushaqtap, jaimen surap edim, áreń entigip aitty. “Qorqamyn” dep jylap, óz denesin sipalai berdi, óz-ózinen jiirkenip turǵany baiqaldy. “Oǵan barma, ol seni óltirip qoiady, sebebi ol sport sheberi” dep ábden úreilenip qalǵan", – dedi Kamila.
Ol birden politsiiaǵa habarlaǵan eken, podezdegi beinebaqylaý kameralaryn tekseripti. Sózinshe, bala osydan keiin qorqyp, tipti kóshege shyǵýdan qalǵan.
Soraqysy – politseiler áieldi bólek shyǵaryp alyp, aryz jazbaýǵa kóndirgen. Ol Naýryzbai aýdandyq politsiia bólimshesine barǵan.
"Shýlatyp ne qylasyz, atyńyzǵa kir keledi. Aryz jazbasańyz qaitedi, oilanyp kórińiz?” dedi. Sonda ol jazasyz qala ma? Ulymnyń joly bolyp, qashyp úlgerdi. Erteń ol adam bireýdi óltiredi ǵoi. Sonda maǵan “sizde dálel joq qoi, 5 ai boiy anda-mynda súireleimiz, sosyn báribir ony bosatyp jiberedi” dedi. Ártúrli kabinetterge jibere berdi. Bir kezde “balańyzdyń esh jeri syrylmaǵan, kógermegen” deidi, sonda ólgende ǵana, zorlaǵanda ǵana kelý kerek pa? dep aiqaiǵa bastym", – dedi ana.
Sodan keiin áieldiń aryzyn qabyldap, kúdikti tergeý izoliatoryna jabylǵanyn aitqan. Biraq kelesi kúni ony kórshiler úidiń mańynan kóripti. Er adamdy qamaýdan bosatyp jibergen.
Turǵyndardyń aitýynsha, buǵan deiin de er adam ersi qylyqtar istegen.
"Bir apta buryn sol kisi páterime kiltin tyǵyp, ashqysy keldi. Kúieýim ekeýmiz úide boldyq. Kúieýim esikti ashty da, “ne istep jatyrsyń?” degende ana kúdikti “shatasyp kettim” dedi. Ol bizden joǵary qabatta turady. Terezemiz ashyq ekenin bilip, balalar baryp bilip, ádeii kelgen ǵoi. Men de aryz jazyp, jábirlengen balanyń anasyna qoldaý kórsetemin. Ol balanyń ornyna kez kelgenimizdiń balasy bolyp qalýy múmkin edi", – dedi Altyn Orda turǵyny Fariza Qanatova.
Turǵyndar kúdiktiń bostandyqta júrgenine narazy. Ol taǵy da qiturqy áreketin qaitalaidy dep qorqady.
"Jer silkinisi, sý tasqyny, endi pedofil. Ne sumdyq mynaý? 6 balam bar, men olardy asyraýym úshin jumys isteimin. Endi mynandai bolsa, men ár balamnyń artynan júrip, únemi erip júre almaimyn ǵoi. Eger politsiia jazalamasa, biz ózimiz jazasyn beremiz", – dedi taǵy bir turǵyn.
Úige jaýapty Home Servise kompaniiasynyń direktory Ashat Qanaev turǵyn úidiń qaýipsizdik sharalaryn kúsheitetinin aityp ýádesin berdi. Ol beinebaqylaý kameralaryn kóbeitip, úige, balalar alańyna qorshaý salatynyn aitty. Aitýynsha, turǵyn úige jaýapty politsiia bólimshesi joq jáne olardyń jumysynyń álsizdiginen kompaniiaǵa shaǵym kóp túsedi.
"Ýchaskelik politsiia 10 kún saiyn aýysady. 7-8 ýchaskelik politsiia aýysqan bolar. Jaýapsyz qalady. Olardy shaqyrýǵa 2-3 saǵat ketedi. 28 úige bir politsiia jetpeidi ǵoi. Naýryzbai aýdandyq politsiiasynan ótinerim, politseiler sanyn kóbeitse eken", – dedi ol.
Jábirlengen balanyń anasy oqiǵa bolǵan jerdi, kúdiktiniń úiin, podezdin kórsetti. Qazir úi bos tur.
Sóz arasynda balanyń anasy buǵan deiin de qurylysshylardyń biri oǵan shabýyldamaq bolǵanyn, liftide qorqytqanyn aitady. Sózinshe, bul jaǵdai bir jyl buryn bolypty.
Bir top kórshi politsiia bólimshesine jol tartqan kezde oqiǵa ornyna politsiia qyzmetkeri Ádilbek Qozybekov keldi.
"Sot saraptamasy taǵaiyndaldy. Qylmystyq kodekstiń 121-baby 3-tarmaǵy “Seksýaldyq sipattaǵy zorlyq-zombylyq áreketter” boiynsha tergeý júrip jatyr. Prokýratýranyń qaýlysymen ony izoliatordan bosatty. Basshylyq quramnyń baqylaýynda", – dedi Qozybekov.
