Elorda ákimi Áset Isekeshev "Jannur" saýda úii mańynda batýtty jel ushyryp áketý saldarynan zardap shekken balalardyń jaǵdaiyn bilý úshin qalalyq №2 balalar aýrýhanasyna bardy, dep habarlaidy ákimniń resmi saity.
Balalardyń ata-anasymen áńgimelesken Áset Isekeshev qala biligi, IID men TJD oqiǵany óz baqylaýyna alǵanyn atap ótti.
Qala basshysy kinálilerdiń jazaǵa tartylatyndyǵyn da málimdedi.
Eske sala ketsek, oqys oqiǵa keshe, 4 mamyr kúni saýda úiiniń mańynda bolǵan edi. Balalar oinap jatqan kezde, batýtty qatty jel ushyryp áketken edi. Bes bala shuǵyl túrde aýrýhanaǵa jetkizildi.
Astana ákimdiginiń ótinishimen balalardy úzdik mamandar ("Neirohirýrgiia ǵylymi ortalyǵy" AQ tóraǵasy Serik Aqshulaqov pen Travmotologiia jáne ortopediia ǴZI direktory Nurlan Batpenov), sondai-aq Ana men bala ulttyq ǵylymi ortalyǵynyń dárigerleri qarap jatyr.
Elorda politseileri QR QK 306-baby 2 tarmaǵyna (qaýipsizdik talaptaryna sai kelmeitin qyzmet kórsetý) sáikes sotqa deiingi tergeýdi bastap ketti.
Aita keteiik, 3 mamyrda tótenshe jaǵdailar departamenti jeldiń kúsheietini týraly habarlandyrý taratqan bolatyn.
Batýt ornatylǵan alań joǵaryda atalǵan saýda úiine tiesili.
Elorda ákimdigi qalanyń saýda jáne oiyn-saýyq ortalyqtarynyń alańyna attraktsiondardy ornatýǵa ruqsattama bermeidi.
Kásipkerlik sýbektileri sharýashylyqty júrgizetin eki sýbektiniń arasyndaǵy jalǵa alý jónindegi kelisimsharttyń negizinde ǵana batýttardy SOSO jáne saýda ortalyqtarynyń alańdaryna ornalastyrady.
Bul tusta zańdy tulǵa, iaǵni saýda ortalyǵy iesiniń jarǵysymen nysan janyndaǵy alańdy jalǵa berý tetigi de qarastyrylýy qajet.
Aita ketsek, qazirgi tańda biznes qyzmetine aralasý shektelip otyr. Degenmen, kásipkerlik sýbektileri (SOSO, qoǵamdyq tamaqtaný oryndary jáne t.b) kelýshilerdiń qaýipsizdigin qamtamasyz etýge barynsha nazar aýdarýy tiis.
