Prezidenttiń kómekshisi – Qaýipsizdik Keńesiniń hatshysy Áset Isekeshev ShYU-ǵa múshe memleketterdiń Qaýipsizdik keńesi hatshylarynyń on altynshy kezdesýine qatysty, dep habarolaidy Aqorda.
Prezidenttiń kómekshisi – Qaýipsizdik Keńesiniń Hatshysy Áset Isekeshev 2021 jylǵy 23 maýsymda Dýshanbede ótken Shanhai yntymaqtastyq uiymyna múshe memleketterdiń Qaýipsizdik keńesi hatshylarynyń on altynshy kezdesýine qatysty.
Is-shara barysynda ShYU keńistiginde qaýipsizdik pen turaqtylyqty qamtamasyz etý salasyndaǵy ahýalǵa bailanysty aýqymdy másele talqylandy.
Taraptar terrorizm, separatizm men ekstremizm, qarý-jaraq pen esirtkiniń zańsyz ainalymyna, transulttyq uiymdasqan qylmysqa qarsy is-qimyl, halyqaralyq aqparattyq qaýipsizdikti qamtamasyz etý siiaqty salalardaǵy yntymaqtastyqty odan ári damytýdyń negizgi aspektileri boiynsha pikir almasty.
Kezdesý barysynda Aýǵanstandaǵy ahýaldy tezirek retteý – ShYU aimaǵynda beibitshilik pen qaýipsizdikti saqtaýdyń negizgi faktorlarynyń biri ekeni atap ótildi. Osyǵan orai taraptar osy eldegi áleýmettik-ekonomikalyq ahýaldyń qalpyna kelýine septigin tigizetin naqty sharalar josparyn kelisý jumystaryn jalǵastyrýǵa ýaǵdalasty.
Áset Isekeshev áriptesterine ShYU qyzmetiniń mańyzdy baǵyttary boiynsha Qazaqstannyń ustanymdaryn jetkizdi jáne elimizdiń múddelerin eskere otyryp, Uiymdy odan ári úilesimdi damytý jóninde birqatar usynystar aitty.
Qazaqstan Qaýipsizdik Keńesiniń hatshysy COVID-19 indetiniń teris áleýmettik-ekonomikalyq saldaryn eńserý, azyq-túlik qaýipsizdigin qamtamasyz etý, mańyzdy ekologiialyq problemalardy sheshý siiaqty máseleler boiynsha birlese atqaratyn sharalarǵa nazar aýdardy. Sondai-aq áriptesterin kiber qylmystarǵa jáne esirtkiniń zańsyz ainalymyna qarsy is-qimyldardy kúsheitýge, jalpy ShYU keńistiginde turaqtylyq pen qaýipsizdikti qamtamasyz etýge shaqyrdy.
Áset Isekeshev Aýǵanstanǵa jan-jaqty kómek kórsetý jónindegi birlesken is-qimyldar qajettigin atap ótip, beibit ómirge qol jetkizý úshin barlyq format boiynsha júrgiziletin kelissózder protsesin jandandyrýǵa Qazaqstannyń daiyn ekenin aitty.
Otyrys qorytyndysy boiynsha is-sharaǵa qatysýshylar tiisti Hattamaǵa qol qoidy. ShYU-ǵa múshe memleketterdiń Qaýipsizdik keńesi hatshylarynyń kezekti kezdesýin Ózbekstan Respýblikasynda ótkizý jóninde sheshim qabyldandy.
Sonymen qatar kezdesý barysynda Áset Isekeshev Resei Federatsiiasy Qaýipsizdik keńesiniń hatshysy N.Patrýshevpen, Qyrǵyz Respýblikasy Qaýipsizdik keńesiniń hatshysy M.Imanqulovpen, sondai-aq, Pákistan Islam Respýblikasy Premer-Ministriniń Ulttyq qaýipsizdik jáne strategiialyq josparlaý máseleleri jónindegi kómekshisi M.Iýsýfpen kelissózder júrgizdi. Kelissózde óńirlik qaýipsizdik salasyndaǵy ózara is-qimyl men yntymaqtastyqty keńeitýdiń ózekti máseleleri qarastyryldy.
