Elorda ákimi Áset Isekeshev astanalyqtar men qala qonaqtaryna aýa raiynyń buzylýyna bailanysty úiden shyqpaýǵa keńes berdi. Shahar basshysy bul týraly óziniń Feisbýk paraqshasynda jazdy, dep habarlaidy "Ult aqparat".
«Qurmetti astanalyqtar men qala qonaqtary! Aýa raiynyń qolaisyzdyǵyna bailanysty tótenshe jaǵdailardyń aldyn-alý maqsatynda kóshede barynsha abai bolýdy suraimyz. Asa qajettilik bolmasa, múmkindiginshe úiden shyqpaýǵa keńes beremiz. Burqasyn jel bolǵan jaǵdaida dalada qalǵan bolsańyz, qaýipsizdik sharalaryn saqtaýlaryńyz qajet», - dep jazady Áset Isekeshev.
Qala ákimi óziniń jazbasynda qurylys alańdarynan aýlaq júrip, jarnama ilingen taqtalardan saqtanyp, elektr symdary men aǵashtardan ainalyp ótý kerektigin atap ótti.
«Tótenshe jaǵdailar departamenti kez kelgen jaǵdaida 112 nómirine habarlasýdy suraidy. Dál qazir qaladaǵy barlyq kommýnaldyq qyzmetter kúsheitilgen tártipte jumys isteýde», - delingen qala ákiminiń jazbasynda.
Eske sala ketsek, keshe Qazgidrometke silteme jasaǵan qala ákiminiń saitynda habarlanǵanyndai, Astanada qar burqasyny 3 kúnge sozylady. 11 qańtarǵa arnalǵan boljam boiynsha kóshpeli bult júrip, qar jaýady, boran soǵyp, kóktaiǵaq bolady.
Sinoptikterdiń boljaýyna qaraǵanda, 12 qańtar kúni burqasynnyń beti qaita bastaidy. Batystan, soltústik-batystan sekýndyna 9-14 metrlik jel soǵyp, túnde aýa temperatýrasy -11... -13 gradýsqa deiin tómendeidi.
