Astana ákimi Áset Isekeshev qala turǵyndaryn páterlerdi zańdy túrde jalǵa berýge shaqyrdy, - dep habarlaidy "Ult aqparat" kaz.tengrinews.kz portalyna silteme jasap.
Ákimniń halyqqa esep berý kezdesýinde páterdi zańsyz jalǵa berýshilermen másele qalai sheshilip jatqany týraly suraq qoiyldy. Áset Isekeshevtiń aitýynsha, qazirgi kezde jalǵa beriletin páterlerdiń málimet bazasy jasalyp jatyr.
"Qalany EXPO-ǵa daiyndap jatqanda turǵyndar da budan paida kórgisi keletinin bilemin. Páterler, bólmelerdi jalǵa beredi. Qazir biz málimetter bazasyn daiyndap jatyrmyz. Óitkeni aimaqtardan adam kóp keledi. Olar qonaqúide emes, páterlerde turǵysy keledi. Sondyqtan osyndai tizim jasap jatyrmyz", - dep jaýap berdi ákim.
Sonymen birge, ákim turǵyndardyń páterlerdi zańdy túrde jalǵa bergisi kelmeitinin aitady. Osyǵan bailanysty qala basshysy adamdardy eshteńeden qoryqpai, zańdy jumys isteýge shaqyrdy.
"Kóptegen adamdar salyq tólegisi kelmei, zańsyz jalǵa beredi. Salyq inspektorlary olardy tirkeýge alyp jatyr. Ol jerde salyq ta óte tómen, jylyna úsh paiyz ǵana. Sondyqtan turǵyndarǵa aitatynym - páterdi zańdy túrde jalǵa berýden esh qoryqpańyzdar. Biz týristerdi tartý úshin málimet bazasyn quramyz. Bul másele bizge túsinikti. Memlekettik kiris departamenti munymen ainalysyp jatyr", - dedi ákim.
