Elimizdiń bas sanitar dərigeri Jandarbek Bekshin Mańǵystaý oblysyndaǵy sarbazdan menigokokk infektsiiasy anyqtalmaǵanyn aitty. Degenmen, onyń diagnozy irińdi meningit bolyp shyqty. Qazir sarbaz aýyr halde jatyr, dep habarlaidy Baq.kz tilshisi.
"Qazir bizde menigokokk infektsiiasy boiynsha jaǵdai turaqty dep aitýǵa bolady. 30-shy tamyzdan bastap tek qana bir jaǵdai tirkeldi. Ol Aqtóbe oblysynda oryn aldy. Ókinishke qarai, naýqas qaitys boldy", - dedi Bekshin.
Onyń aitýynsha, jyl basynan beri elimizde 83 jaǵdai tirkelip, 15-i ólimmen aiaqtalǵan.
"Mańǵystaý oblysynda sarbaz aýyryp, 3-4 kún əskeri bólimde emdelgen. Ol aýyr halde jatyr. Taldaý nátijesinde menigokokk infektsiiasynyń qozdyrǵyshy anyqtalǵan joq. Onyń diagnozy - streptokoktan týyndaǵan irińdi meningit. Irińdi meningit ólimge əkelýi múmkin. Biraq, onyń menigokokk infektsiiasyna qaraǵanda qorshaǵan ortaǵa qaýpi tómendeý. Iaǵni, ol aýa arqyly taramaidy. Naýqaspen bailanysta bolǵan barlyq sarbazdar tekserildi, olardan infektsiia anyqtalǵan joq", - dedi Jandarbek Bekshin.
Eske salsaq, 21 jastaǵy sarbaz 30-shy qyrkúiek kúni Aqtaý qalasynyń juqpaly aýrýlar aýrýhanasyna menigokokk infektsiiasyna kúdikpen túsken edi.
