Islam revoliýtsiiasy saqshylary korpýsynyń sheteldegi arnaiy operatsiialaryna jaýapty áskeri bólimdi basqarǵan general Kasem Súleimani 3 qańtarda Baǵdatta qaza tapty. Ol juma kúni Baǵdat halyqaralyq áýejaiyna jasalǵan áýe soqqysy kezinde mert bolǵan. Bul aqparatty birinshi bolyp Irannyń memlekettik telearnasy habarlady. Pentagon ókili bul AQSh prezidenti Donald Tramp buiryǵymen ótkizilgen Amerikanyń áskeri operatsiiasy ekenin rastady.
Sýleimanimen birge Iran qoldaityn qarýly top jetekshileriniń biri Ábý Mahdi ál-Mýhandis te mert bolǵan. Associated Press agenttigindegi qupiia derekkózge sáikes, Sýleimani mingen ushaq Baǵdat áýejaiyna qonǵan kezde áýeden soqqy jasalǵan.
Sýleimani Irannyń áskeri qurylymy men Islam revoliýtsiiasy saqshylary korpýsynyń eń yqpaldy tulǵalarynyń biri bolǵan.
Áýe shabýyly Iraktaǵy Amerika áskerileri men Irandy qoldaityn qarýly toptar arasynda jaǵdai ýshyqqan kezde jasalyp otyr. 27 jeltoqsanda Iraktaǵy Amerikanyń áskeri bazasyna áýeden shabýyl jasalyp, sonyń saldarynan kelisim-shart boiynsha jumys istegen amerikalyq sarbaz mert bolǵan. Buǵan "jaýap" retinde jasalǵan áýe soqqysynan Iran qoldaityn qarýly toptyń 25 sodyry ólgen.
31 jeltoqsanda qarýly top ókilderi Baǵdattaǵy Amerika elshiligin basyp alýǵa tyrysyp, elshilik aýmaǵyndaǵy bir ǵimaratty joiyp jibergen. Ol jaqqa 750 AQSh sarbazynyń jetkizilgeni belgili bolǵannan keiin iaǵni, eki kúnnen keiin elshilik qorshaýdan bosady.
AQSh prezidenti Donald Tramp elshilikke shabýyldy Iran uiymdastyrdy dep aiyptady. Tegeran muny joqqa shyǵardy.
Sýleimanidiń óliminen keiin Iran men Iran qoldaityn qarýly toptar Amerikanyń Taiaý Shyǵystaǵy áskeri nysandaryna shabýyl jasaidy degen boljam aitylyp jatyr.
