Irannyń rýhani kósemi Aiatolla Hamenei AQSh-taǵy prezident sailaýynyń ótý barysyn mysqyldap, tartysty básekeni “spektakl” dep atady.
Sailaý ýchaskeleriniń jabylǵanyna 24 saǵattan astam ýaqyt ótse de, AQSh-ta prezident sailaýynyń jeńimpazy anyqtalmady. Báseke erekshe tartysty ótip jatqan shtattarda daýys sanaý áli jalǵasyp jatyr.
Donald Tramp keibir shtattarda zańbuzýshylyq bolǵanyn málimdep, sottan daýys sanaýdy toqtatýdy suraǵan. Dáleli joq Tramptyń áreketin kóptegen respýblikashyl áriptesteri aiyptaǵan.
Al Djo Baiden árbir Amerika azamatynyń daýysy esepteletinin aityp, Tramp shtabynyń "zańnamalyq qarsylyǵyna" tótep beretinin jetkizdi.
“Ne degen spektakl! Biri Amerika tarihynda buryn-sońdy bolmaǵan jalǵan sailaý ótti deidi. Muny qazir prezident keńsesinde otyrǵan memleket basshysy aityp otyr. Al onyń qarsylasy Tramp sailaýdy ádeii burmalaǵysy keledi deidi. AQSh-taǵy sailaý men AQSh demokratiiasynyń naǵyz beinesi osy” dep jazdy Hamenei Twitter-de.
Osyǵan deiin Hamenei AQSh-taǵy sailaýda kim jeńse de, Irannyń AQSh-qa qatysy ustanymy ózgermeidi dep málimdegen edi.
Tramp 2015 jyly Iran jáne ózge alyp memlekettermen jasasqan iadrolyq kelisimnen shyǵyp, Tegeranǵa ekonomikalyq qysymyn údetken edi.
Al Baiden osyǵan deiin sailaýda jeńse, kelisimge qaita qosylatynyn málimdegen.
Sarapshylardyń aitýynsha, Vashington men Tegeran arasyndaǵy qarym-qatynasty AQSh-taǵy sailaý ǵana sheshpeidi.
2021 jyly maýsym aiynda Iranda prezident sailaýy ótedi. Prezidenttiktiń eki merzimin aiaqtaǵan qazirgi basshy Hasan Roýhani biraq oǵan qatysa almaidy. Daýly iadrolyq kelisimniń jasalýyna kóp kúsh-jiger jumsaǵan Roýhani kelisim sátsiz shyqqany úshin synshylar qysymyna ushyraǵan.
Iranda bilik baqylaýymen ótetin prezident sailaýyna ádette saiasi, áskeri, dini elitadan iriktelgen kandidattar qatysady.
2017 jyly prezident sailaýynan keiin Hameneige jaqyn saiasatkerlerdiń biri Roýhani jeńgen sailaýda daýys urlaý kóp bolǵanyn málimdegen.
2009 jylǵy daýly sailaýdan keiin elde jappai narazylyq tutanyp, arnaiy jasaq dóreki kúsh qoldanyp, basqan.
