Iran biligi onlain jumysy 2017 jyly jappai narazylyqqa shyǵýǵa alyp keldi degen dissident jýrnalist Rýholla Zamdy ólim jazasy úkimimen darǵa asty. Bul týraly 12 jeltoqsan kúni ISNA aqparattyq agenttigi habarlady.
Osydan birneshe kún buryn Iran joǵarǵy soty 47 jastaǵy jýrnalistiń úkimin kúshinde qaldyrǵan. Sottyń bul sheshimin halyqaralyq qaýymdastyq synǵa aldy.
Rýholla Zamdy ólim jazasyna maýsym aiynda Revoliýtsiia soty kesken. "Shekarasyz tilshiler" (RSF – Reporters without border) uiymy úkimdi ádiletsiz dep atady.
Revoliýtsiialyq sot jýrnalisti "zulymdyq pen zorlyqty taratty" dep aiyptady. Iranda bul aiypty ádette tyńshylyq jasaý ne bilikti tóńkerý isteri boiynsha taǵady.
Rýholla Zam negizin qalaǵan AmadNews saity men Telegram-kanal 2017 jylǵy narazylyq kezinde halyqqa qarsylyq aktsiiasynyń ótetin ýaqyty jóninde habar berip, Iran sheneýnikterin masqaralaityn aqparat jariialap otyrdy.
Irandaǵy 2017 jylǵy narazylyq 2009 jyldan bergi eń iri qarsylyq boldy. Sailaý nátijesinen keiin elde tolqý bolyp, politsiia myńdaǵan adamdy qamaýǵa aldy, 25 adam qaza tapty.
Zam Parijde turyp, sol jaqtan jumys istegen. Biraq keiin Iran biligi ony aila arqyly elge keltirip, 2019 jyly qazanda belgisiz jaǵdaida qamaýǵa alǵan. Frantsiia biligi Tegerannyń bul áreketin qatań aiyptady. Odan keiingi ailarda Iran telearnalary Zamnyń zańdy buzǵanyn moiyndap, áreketi úshin keshirim suraityn videosyn jariialady.
Oǵan deiin ol ózine taǵylǵan aiypty joqqa shyǵarǵan. Iran tutqyndardy qysym ne azap arqyly "kinásin moiyndatýǵa" jii barady.
