Iran biligi koronavirýstyń taraýyna bailanysty 70 myńǵa jýyq tutqyndy qamaýdan bosatty. Bul týraly eldiń sot biliginiń basshysy Ibragim Raisi aitty. Sońǵy bir táýlikte Iranda koronavirýs saldarynan taǵy 43 adamnyń qaitys bolǵany habarlandy.
- Qaýipsizdikke qater tóndirmeitin jaǵdaida... qamaýda otyrǵandardy bosatý jalǵasady, - dedi Raisi 9 naýryzda. Qamaýdan bosatylǵandar túrmege qashan oralady álde bilik olardy birjola bosatty ma – sheneýnik ol týraly ashyp aitpady.
Iran densaýlyq saqtaý ministrliginiń ókili Kianýsh Djahanpýr elde virýs juqtyrǵandar sany 595 adamǵa kóbeiip, qazirgi kezde dertke shaldyqqan 7161 adam baryn habarlady. Ol jariialaǵan resmi málimette koronavirýstan elde 237 adam qaitys bolǵany aitylǵan. 9 naýryzda Irannyń joǵarǵy basshysy aiatolla Áli Hameneidiń keńsesi koronavirýsqa bailanysty biylǵy Naýryz meiramynda Hameneidiń jurt aldyna shyǵyp sóilemeitinin habarlady.
"Jyl saiyn qasietti Imam Reza kesenesinde ótetin joǵarǵy basshynyń sóz sóileý rásimi... biyl ótpeidi" delingen Hamenei keńsesi taratqan habarlamada. Buǵan qosa osy meshit ornalasqan Meshhed qalasyna da aiatollanyń barmaityny belgili boldy.
Iran biligi eldegi mektepter men ýniversitetterdi jaýyp, mádeni sharalar men sport jarystary ótpeitinin habarlaǵan. Koronavirýstyń taralýyn tejeý maqsatynda elde jumys ýaqyty da qysqartylǵan. Sarapshylar Iran biligi koronavirýs juqtyrǵandar sanyn azaityp kórsetip otyrýy múmkin dep seziktenedi.
