Iran AQSh sanktsiiasynyń saldarynan 100 mlrd dollar munai túsiminen aiyryldy. Bul týraly Iran vitse-prezidenti Ishak Djahangiri habarlady. IRNA agenttiginiń jazýynsha, ol bul sózin Kermanshah provintsiiasynda munai-himiia kásiporny jobasynyń ashylý rásimine qatysqan kezde aitqan.
Onyń sózine qaraǵanda, AQSh sanktsiiasy Iran ekonomikasyna orasan ziian tigizgen. "Sanktsiia bolmaǵanda iran halqy osynshalyqty dárejede kúrdeli ekonomikalyq tyǵyryqqa tirelmes edi" dedi Djahangiri.
Iran vitse-prezidenti munai-himiia ónerkásibiniń mańyzyn atap ótip, jeke sektor ókilderin ekonomikanyń osy salasyna investitsiia quiýǵa shaqyrdy.
Byltyr 26 qyrkúiekte prezident Hasan Roýhani 2018 jyly qaita kúsheigen sanktsiianyń saldarynan el ekonomikasy 150 mlrd dollar kóleminde kiristen aiyryldy dep málimdegen.
AQSh sanktsiiasy Iran ekonomikasynyń negizgi tarmaqtary - munai óndirý jáne bank salasyn qamtidy. 2018 jyldyń 5 qarashasynan bastap Vashington Irannan munai eksporttaýǵa jáne irandyq munai óndirý kompaniialarymen bailanys ornatýǵa tyiym salǵan. Sol kezdegi AQSh prezidenti Donald Tramp Iranǵa "buryn-sońdy bolmaǵan qatań sanktsiia salyndy" dep aitqan.
2018 jyly 8 mamyrda AQSh prezidenti Donald Tramp Iran, AQSh, Resei, Qytai, Ulybritaniia, Frantsiia jáne Germaniia arasynda 2015 jyly qoiylǵan iadrolyq kelisimnen shyǵatynyn málimdegen. Tramp bul kelisimdi Barak Obama prezidenttigi tusynda jasalǵan eń nashar kelisim dep ataǵan. Al kelisimge qol qoiǵan Eýropa elderi bul qujat Tegerannyń iadrolyq baǵdarlamasyn tejeidi dep aitqan.
Vashington AQSh Iranǵa "barynsha qysym jasaý" arqyly Tegerannyń "zulym nietin" ózgertip, ony iadrolyq ambitsiiasynan bas tartýǵa májbúrleidi dep málimdegen.
