Iraktyń barlaý qyzmeti "Islam memleketi" (IM) terroristik tobynyń jetekshisin qamaýǵa alǵanyn málimdedi. Bul týraly "ál-Arabiia" arnasy habarlady.
Arnaiy qyzmet ókilderiniń habarlaýynsha, qamaýǵa alynǵan adam byltyr qazan aiynda Amerika áskeriler IM-niń burynǵy basshysy Ábý Bákir ál-Baǵdadidi óltirgennen keiin uiymdy basqarǵan.
"Islam memleketi" uiymynyń habarlamalarynda uiym basshysynyń aty-jóni Ábý Ibragim ál-Hashimi ál-Kýrashi dep aitylady. Vashingtonnyń pikirinshe, bul uiymnyń negizin qalaýshylardyń biri ári ideology Ámir Muhammed Ábdel Rahman ál-Maýldiń laqap aty bolýy múmkin. Bul týraly "Amerika daýysy" jazǵan. Irak barlaý qyzmetiniń aitýynsha, qamaýǵa alynǵan adamnyń shyn aty - Ábdelnasyr ál-Kirdash.
Onyń tolyq ómirbaiany aitylmaidy. Reseilik Directorate 4 telegram-arnasy aty-jónin aitpaǵan irak sarapshysyna silteme jasai otyryp, qamaýǵa alynǵan adam "Ál-Qaidanyń" joǵary laýazymdy múshesi bolýy múmkin dep topshylaidy. Sondai-aq, 2011-2019 jyldary IM-niń Siriiadaǵy jetekshisi bolǵan-mys.
IM jetekshisiniń qashan jáne qai jerde qamaýǵa alynǵany aitylmaidy. Barlaý qyzmetiniń málimeti negizinde ustalǵany ǵana belgili. "Ál-Arabiia" arnasynyń habarlaýynsha, sáýir aiynyń basynda Iraktyń barlaý qyzmetiniń jetekshisi Mýstafa ál-Kazemi Irak úkimetin basqarǵan.
