Irak kúshtik qurylymdary "Islam memleketi" ekstremistik toby áskeri jetekshileriniń birin atyp óltirdi. Bul týraly 28 qańtarda Irak premer-ministri Mýstafa ál-Kazymi habarlady. Bir apta buryn osy uiymnyń músheleri Baǵdat ortalyǵyndaǵy bazarda ózderin jaryp, ondaǵan adam qaza bolǵan.
"Bizdiń qaharman sarbazdarymyz operatsiia barysynda IM komandiri Ábý Iasir ál-Issavidiń kózin joidy" dep jazdy Kazymi Twitter-de.
Ál-Issavi (Jappar ál-Issavi) Kirkýk qalasynyń batysynda júrgizilgen áskeri operatsiia barysynda óltirilgen. Bul aimaqta áli de IM sodyrlary kezdesedi. Operatsiiany Iraktyń terrorizmmen kúres elitalyq qyzmeti barlaý basqarmasynyń kómegimen júrgizgen.
Terrorizmmen kúres qyzmetiniń habarlaýynsha, Irak áskeri IM sodyrlarymen qaqtyǵysyp, ál-Issavi sol atys kezinde qaza tapqan.
Ótken aptada IM Baǵdat ortalyǵyndaǵy adam kóp júretin bazarda bolǵan shabýyldy moinyna alǵan. Egiz jigit ózderin jaryp, eki jarylystan keminde 32 adam qaza bolǵan. Bul úsh jyl ishindegi eń iri shabýyl.
Irak biligi bul 2017 jyly jeńiliske ushyrap, artqa shegingen IM-niń qaita jandana bastaǵanyn bildirýi múmkin dep málimdedi. Sodyrlar Kirkýk mańyndaǵy shóleit jáne taýly aýdandarda qimyldap jatyr. 21 qańtar kúngi iri shabýyldan keiin Irak kúshtik qurylymdary qatty synǵa ushyraǵan.
