GettyImages.ru
Iordaniia patshaiymy Raniia Izraildiń bombalaýy saldarynan Gaza sektoryndaǵy beibit turǵyndardyń ólimin aiyptamaǵan Batys basshylaryna narazylyǵyn bildirdi, dep habarlaidy Kazinform agenttigi CNN-ge silteme jasap.
CNN tilshisi Kristian Amanpýrǵa bergen ekskliýzivti suhbatynda Raniia:
«Taiaý Shyǵys elderi, onyń ishinde Iordaniianyń halqy álemniń soǵysqa qarsy áreketinen kóńili qaldy. Sońǵy eki aptada biz álemdegi ekijúzdiliktiń kýási boldyq.
7 qazanda bolǵan oqiǵaǵa qatysty álem birden Izraildi jáne onyń ózin-ózi qorǵaý quqyǵyn qoldady jáne jasalǵan shabýyldy aiyptady... Biraq sońǵy eki aptada bolǵan oqiǵalarǵa qatysty álemniń jaq ashpai otyrǵanyn kórip otyrmyz», - dedi.
Izrail qorǵanys kúshteriniń málimetinshe, el 7 qazanda Palestinanyń jaǵalaýdaǵy anklavty baqylaityn HAMAS toby jasaǵan shabýyldarynan keiin Gaza sektoryna «tolyq blokada» jariialady, saldarynan 1 400-den asa adam qaza taýyp, 200-den astam adam kepilge alyndy.
Atalmysh qorshaý halqy tyǵyz ornalasqan Gaza sektoryn aiaýsyz áýe shabýyldarynyń astynda qaldyryp, oqshaýlanǵan aimaqtyń búkil halqy úshin azyq-túlik pen sýdy qosa alǵanda, ómirlik mańyzdy kerek-jaraqtardy buǵattady.
«Búgingi zaman tarihynda adamzattyń munsha azap shegýi birinshi ret bolyp tur. Al álem atysty toqtatýǵa shaqyrmai otyr. Bul únsizdik batys elderin sybailas etedi», - dedi patshaiym Raniia.
Gazadaǵy HAMAS baqylaýyndaǵy Palestina densaýlyq saqtaý ministrliginiń sońǵy málimetteri boiynsha, Izrail soqqylarynan qaza tapqandar sany 5 000-nan asty, onyń ishinde 2 000-nan astamy balalar. BUU-nyń kem degende 35 qyzmetkeri qaza tapty.
«Men, palestinalyq analar da basqa analar siiaqty balalaryn jaqsy kóretinin álemniń esine salǵym keledi», - dedi Raniia.
Aita keteiik, Arab elderi kóshbasshylary AQSh-tyń Izraildi tejeýge niet tanytpaǵanyna narazylyq bildirdi. Iordaniia, Mysyr jáne Palestina avtonomiiasy ótken aptada AQSh prezidenti Djo Baidenmen josparlanǵan Iordaniia sammitinen bas tartty.
