Túrkistan oblysynyń ákimi Darhan Satybaldy «Sembol Construction» kompaniiasynyń qarjy jónindegi Atqarýshy Keńesiniń múshesi Oktai Gorgýlmen kezdesti, dep habarlaidy «Ult aqparat» oblys ákimdiginiń baspasóz qyzmetine silteme jasap.
Atalǵan kompaniia Túrkistanǵa kezekti investitsiiasyn salyp, aýqymdy jobalardy júzege asyrmaq. Atap aitsaq, óńirde kabel jáne keramikalyq ónimder men santehnika shyǵaratyn zaýyt ashýǵa nietti. Oblys ákimi investitsiialyq jobalarǵa árdaiym qoldaý kórsetiletinin jetkizdi.
«Sizder usynyp otyrǵan jobalar biz úshin óte mańyzdy. Investitsiia quiamyn deitin kompaniialarǵa, azamattarǵa qoldaý kórsetýge árqashan daiynbyz. Jobalardy iske asyrýǵa arnalǵan infraqurylym boiynsha suranystaryńyzdy tolyq oryndaimyz. Arnaiy ekonomikalyq aimaqtan jer, infraqurylym usynamyz. Qazaqstan-Túrkiia yntymaqtastyǵynyń Túrkistan oblysynyń damýynda erekshe mańyzy bar ekenin atap ótkim keledi. Túrkistan – qasietti shahar. Qasietti qalada aitylǵan ýádeler, sózder oryndalýy kerek. Áriptestigimiz nyǵaiyp, jobalar júzege asady dep senemin», – dedi Darhan Satybaldy.
Oktai Gorgýl Túrkistan qalasyn aralap kórgenin, seriktesterimen birge zerttei kele qalaǵa investitsiia salý jóninde sheshimge kelgenderin aitty.
«Biz usynyp otyrǵan eki joba júzege assa, óńir ekonomikasyna oń serpin beredi dep oilaimyn. Birinshi jobamyz – kabel shyǵaratyn zaýyt. Onyń investitsiialyq quny – 84 mln. AQSh dollary. Kabel ónimderi men túrleri shyǵarylatyn zaýytta túrkistandyqtar jumyspen qamtylady. Jylyna 12 myń tonna ónim shyǵaramyz degen jospar bar. Ekinshi joba – keramika ónimderi men santehnika shyǵaratyn zaýyt. Zaýyttyń jyldyq qýattylyǵy – 6 mln. sharshy metr. Investitsiialyq quny – 150 mln. AQSh dollary. Zaýyt salý jumystarymen osy salada tájiribesi bar túrkiialyq kompaniialar ainalysady», – dedi túrkiialyq investor.
Keramikalyq ónimder shyǵaratyn zaýytta Italiianyń qurylǵylary ornatylmaq. Sońǵy tehnologiialar qoldanylady. Atalǵan zaýyttarda 1000-ǵa jýyq jumys orny ashylmaq. Búginde Qazaqstan kabel men keramikalyq ónimderdiń basym bóligin shetelden importtaidy. Naqtyraq aitsaq, elimizge 150 mln. dollarǵa keramikalyq plitkalar, 37 mln. dollarǵa sanfaians, sondai-aq 236 mln. dollarǵa kabelder men symdar tasymaldanǵan. Bul zaýyttar arqyly otandyq ónimniń úlesi artatyn bolady.
Oblys ákimi zaýyttardy salý úshin jan-jaqty qoldaý kórsetiletinin aitty. Túrkiialyq investorlarǵa bul máseleni taǵy da pysyqtap, arnaiy sharttardy bekitip, birlese jumys isteýge shaqyrdy.
