Foto: Almaty ákimdigi
2025 jyldyń qorytyndysy boiynsha Almatynyń negizgi kapitalyna salynǵan investitsiia kólemi 2,3 trln teńgege jetti. Al tikelei sheteldik investitsiia kólemi 8,5 mlrd AQSh dollary boldy, dep habarlaidy Ult.kz.
Sheteldik investitsiianyń negizgi bóligi kóterme jáne bólshek saýda salasyna, sonyń ishinde avtomobil men mototsikldi jóndeýge baǵyttaldy. Atap aitsaq, bul 4 mlrd AQSh dollary nemese jalpy kólemniń 47%-y.
Qarjy jáne saqtandyrý qyzmeti — 1,3 mlrd AQSh dollary (15,5%), aqparat jáne bailanys salasy — 1,2 mlrd AQSh dollary (14%), sondai-aq kólik jáne qoima salasy — 646 mln AQSh dollary (7,5%) kóleminde boldy.
Qalaǵa sheteldik investitsiialar negizinen Resei, Niderland, Ońtústik Koreia, Belgiia jáne Qytai seriktesteri esebinen qamtamasyz etiledi.
2026 jyly da qaladaǵy investitsiialyq belsendilik saqtalýda. Qańtar-naýryz ailary aralyǵynda investitsiia kólemi 373 mlrd teńge boldy.
Sonymen qatar investitsiialyq salymdardyń qurylymy da ózgerip keledi. Buryn investitsiianyń negizgi bóligi qurylys sektoryna tiesili bolsa, búginde jabdyqtar saýdasy men tehnologiialyq jańǵyrtý salalarynda oń dinamika baiqalady. 2026 jyldyń basyndaǵy jaǵdai boiynsha osy baǵyttaǵy investitsiianyń úlesi 66%-ǵa jetti. Bul óndiristik sektordaǵy investitsiialyq belsendiliktiń artqanyn kórsetedi.
Biyl aqpan aiynda investitsiianyń eń joǵary kólemi aqparattyq tehnologiia jáne bailanys salasynda tirkeldi. Bul shamamen 39 mlrd teńge nemese bir aidaǵy jalpy investitsiia kóleminiń 30%-dan astamy.
Búginde Almaty joǵary investitsiialyq belsendiligin saqtap, Ortalyq Aziiadaǵy biznesti tartatyn negizgi ortalyqtardyń biri retinde qalyptasyp keledi.
Qalanyń investitsiialyq jáne ekonomikalyq turaqtylyǵynyń negizgi faktorlary – damyǵan infraqurylym, Indýstriialyq aimaq jáne bizneske salyqtyq ári kedendik jeńildikter usynatyn «Innovatsiialyq tehnologiialar parki» arnaiy ekonomikalyq aimaǵy.
