QR Premer-Ministri Asqar Maminniń tóraǵalyǵymen ótken Investitsiialyq ahýaldy jaqsartý jónindegi keńes otyrysynda jańartylatyn energiia kózderin damytý jáne QR tómen kómirtekti ekonomikaǵa kóshýi máselesi qaraldy, dep habarlaidy primeminister.kz.
«Jasyl ekonomikany» damytý jáne jańartylatyn energiia kózderine sheteldik investitsiialardy tartý perspektivalary týraly 26-shy klimattyq sammittiń óńirlik elshisi Devid Morgan, Amerikalyq saýda palatasynyń QR-daǵy atqarýshy direktory Doris Bredbiýri, Qazaqstanda akkredittelgen AQSh elshisi Ýiliam Mozer, Niderlandy elshisi Andre Karstens, Kanada elshisi Nikolia Brýsso, Halyqaralyq energetika agenttigi bas direktorynyń orynbasary Meri Ýorlik, QR-daǵy EQDB ókildiginiń direktory Agris Preimanis, sondai-aq GE, Chevron, Morgan Lewis jáne t. b. kompaniialardyń ókilderi baiandama jasady.
Qabyldanǵan sharalar týraly ekologiia, geologiia jáne tabiǵi resýrstar ministri Maǵzum Myrzaǵaliev pen energetika birinshi vitse-ministri Murat Júrebekov aqparat berdi.
Qazaqstan ekonomikasyn dekarbonizatsiialaý jáne energiia tiimdiligin arttyrý máseleleri, Parij kelisimi boiynsha mindettemelerdi oryndaý tetikteri, klimattyń ózgerýine beiimdelý sharalary, sondai-aq jańartylatyn energiia kózderi salasyndaǵy investitsiialyq jobalardy iske asyrýdyń praktikalyq aspektileri talqylandy.
«2020 jylǵy jeltoqsanda BUU aiasynda uiymdastyrylǵan Klimattyq ambitsiialar jónindegi sammitte QR Prezidenti Qasym-Jomart Toqaev Qazaqstannyń 2060 jylǵa qarai kómirtekti beitaraptyqqa qol jetkizý maqsaty týraly jariialady. Biz energiia óndirisiniń jalpy kóleminde jańartylatyn energiia kózderiniń úlesin arttyrý boiynsha barynsha kúsh-jiger jumsaimyz. Máselen, 2020 jylǵy jaǵdai boiynsha bul kórsetkish 3%-dy qurady, 2022 jyly ony 6%-ǵa deiin eki esege arttyrý josparlanýda. 2030 jylǵa qarai Qazaqstannyń energetikasyndaǵy jasyl energiianyń úlesi 15%-ǵa deiin jetkiziledi», — dedi A. Mamin.
Úkimet basshysy 2020 jyly QR-nyń «jasyl ekonomikaǵa» kóshýi jónindegi tujyrymdamany iske asyrýdyń 2021-2030 jyldarǵa arnalǵan jańartylǵan is-sharalar jospary qabyldanǵanyn atap ótti.
Jospar EO seriktesterimen tyǵyz yntymaqtastyq ornata otyryp ázirlendi, onda el aldynda turǵan asa eleýli ekologiialyq syn-tegeýrinderdi joiý jónindegi sharalar qarastyrylǵan.
Josparlanǵan is-sharalardy oryndaý álemniń asa damyǵan 30 ekonomikasynyń tizimine kirý jónindegi maqsatqa qol jetkizgen kezde Qazaqstannyń «jasyl» ósim boiynsha uzaq merzimdi mindettemeleriniń saqtalýyn qamtamasyz etýge múmkindik beredi.
Premer-Ministr Qazaqstannyń balamaly energetikany damytý úshin investitsiialyq ortany jaqsartý jóninde sharalar qabyldaǵanyn atap ótti.
«Biz jańartylatyn energiia kózderin óndirýshilerdi qoldaý jáne naryqtyń investitsiialyq tartymdylyǵyn jaqsartý boiynsha birqatar keshendi shara qabyldadyq. Máselen, suranys qurylymyn óndirýshiler úshin barynsha boljamdy ári eleýli etý úshin jańartylatyn energiia kózderi boiynsha aýktsiondar engizildi. Sonyń nátijesinde sońǵy 6 jylda JEK-tiń belgilengen qýaty shamamen 10 esege – 2014 jylǵy 180 MVt-tan 2020 jyly 1650 MVt-qa deiin ulǵaidy», — dedi A. Mamin.
Turaqty damý mindetterin iske asyrý maqsatynda Qazaqstanda jańa Ekologiialyq kodeks qabyldandy, ol QR-da jańartylatyn energiia kózderiniń ozyq tehnologiialaryn jedel engizýge yqpal etetin bolady.
Qazaqstannyń 50 iri kásiporny óziniń óndiristik protsesinde eń ozyq qoljetimdi tehnologiialardy paidalanýdy keńeitýge mindetti bolady.
