Foto: Pixabay.com
Qazaqstannyń Ishki ister ministrliginiń Interpoly Kambodjada jumysqa turmaq bolǵan azamatty eńbek qanaýynan qutqaryp qaldy, dep habarlaidy Ult.kz.
Qazaqstandyq boijetken Kambodja Koroldigine qonaqúi ákimshisi qyzmetine ornalasý maqsatymen ushyp barǵan. Alaida barǵan soń jumys usynysynyń artynda zańsyz áreket turǵany anyqtalǵan.
Boijetkenniń eńbek quldyǵyna tartylý qaýpi týyndaǵany belgili bolǵan sátte Qazaqstan IIM Interpoly dereý shara qabyldap, Kambodjadaǵy áriptesterine – Interpoldyń Ulttyq ortalyq biýrosy men adam saýdasyna qarsy kúres tobyna resmi suranys jiberdi. Jedel áreket pen halyqaralyq ózara úilesimdiliktiń nátijesinde boijetken aman-esen qutqarylyp, eline oraldy.
Qazirgi ýaqytta atalǵan azamatty shetelge jumysqa ornalastyramyz dep aldaǵan jáne ony zańsyz eńbekke tartýǵa árekettengen tulǵalardy anyqtaý sharalary júrip jatyr. Olar zań aiasynda jaýapqa tartylatyn bolady.
Bul jaǵdai adam saýdasymen kúrestegi halyqaralyq yntymaqtastyqtyń naqty tiimdiligin kórsetti. Buǵan deiin de IIM Frantsiianyń Lion qalasyndaǵy Interpol shtab-páterinde kelissózder júrgizip, qaýipsizdik salasyndaǵy yntymaqtastyqty kúsheitýge basymdyq berip kelgen.
Qazaqstan jaqynda Interpoldyń adam saýdasyna qarsy “Liberterra II” atty halyqaralyq operatsiiasyna da qosylǵan bolatyn. Osy operatsiia aiasynda Laos elinde zańsyz ustalǵan taǵy bir qazaqstandyq boijetken qutqarylyp, elge jetkizildi.
