Túrkiiada Halyqaralyq qylmystyq politsiia uiymynyń Bas Assambleiasy – Interpoldyń 89-shy sessiiasy ótip jatyr, alqaly jiynǵa qazaqstandyq delegatsiiany Ishki ister ministri Erlan Turǵymbaev bastap bardy, dep habarlaidy QazAqparat Polisia.kz saityna silteme jasap.
Assambleianyń sońǵy kúni osy uiymnyń Atqarýshy komitetine basshy laýazymdarǵa sailaý ótti. Interpoldyń jańa prezidenti bolyp kópshiliktiń daýysymen Birikken Arab Ámirlikteriniń ókili Ahmad Naser Ál-Reisi sailandy. Sonymen qatar, delegatsiialar ókilderiniń jalpy daýys berýi arqyly Mikroneziia Federativtik Shtattary Interpoldyń jańa 195-shi múshesi boldy.
Sessiianyń qorytyndy kúninde uiymnyń aǵymdaǵy jáne kelesi eki jylǵa arnalǵan qarjy biýdjeti qaralyp, jumystyń jańa ádisteri, onyń qyzmetiniń negizgi baǵdarlamalary jáne qazirgi zamanǵy syn-tegeýrinder men qaýipterge qarsy kúrestegi ózara is-qimyldyń ózge de ózekti máseleleri talqylandy. Erlan Turǵymbaev Interpoldyń jańadan sailanǵan prezidenti Ahmad Naser Ál-Reisimen ekijaqty kezdesý barysynda yntymaqtastyq, onyń ishinde transulttyq qylmysqa, zańsyz kóshi-qonǵa, adam saýdasyna qarsy is-qimyl, qylmyskerlerdi ustaý, kiberqaýipsizdik, aqparat almasý jáne basqa da máselelerdi talqylady.
Sonymen qatar, Ahmad Naser Ál-Reisi Qazaqstannyń Ishki ister ministrin kelesi jyldyń aqpan aiynda BAÁ-de ótetin jyl saiynǵy politsiia kórmesine shaqyrdy. Kórme politsiia qyzmetinde qoǵam qaýipsizdigine arnalǵan jańa jabdyqtardy, tehnologiialar men materialdardy kórsetýge, azamattardy qorǵaý jáne olarǵa kómektesý, sondai-aq qyzmetkerlerdi oqytý jáne biliktiligin arttyrý salalaryna arnalady.
