Senat depýtaty Sáýle Aitbaeva internette diisertatsiiany aqyly jazý jónindegi jarmananyń tolyp júrgenine alańdaýshylyq bildirdi, dep habarlaidy "Ult aqparat".
«Internetke kirip «doktorlyq nemese kandidattyq dissertatsiiany satyp alý» dep terip qalyp edim, 46 sekýndttyń ishinde osyndai qyzmetti usynatyn 3300 nátije shyǵa keldi. Zakaz-kz saitynyń ishinde tipti «ýaqytyńyzdy únemdep, kerekti dissertatsiiany alasyz, ony biliktiligi joǵary mamandar jazady» dep, baǵasyna deiin kórsetilgen. Tipti sol ǵylymi jumystardy jasaǵan adamdardy maqtaý sózderine deiin salyp qoiypty. Bul baǵytta plagiat kóbeiip, sapa tómendep ketti. Al Qazaqstannyń ǵylymy týraly maqala internette óte az. Osyny qalai shekteimiz?» - dep surady depýtat Bilim jáne ǵylym vitse-ministri Sholpan Qarinovadan.
Bul suraqqa jaýap bergen vitse-ministr bul máseleden Bilim jáne ǵylym ministrligi habardar ekenin málim etti.
«Qazir bul problemaǵa monitoring jasap otyrmyz. Bilim jáne ǵylym ministrligi jyl saiyn qabyldanyp jatqan normativti-quqyqtyq qujattar ǵylymi uiymdardyń ózine, ǵylymi ataq alý tártibine qoiylatyn talaptardy taldaýǵa baǵyttalǵan. Buǵan deiin qandai sharýalar atqaryldy? Plagiat jáne ǵylymi qyzmetkerlerdiń moiyndalýy turǵysynan birqatar talap kúsheitildi. Ǵylymi qyzmetkerler arasynda bul máseleni keńinen talqyladyq. Málimetterdi qarap otyrsaq, jyl saiyn doktorantýrǵa bólinetin granttar sany 2 myńdy quraidy. Odan bólek óz qarajatymen túsetin adamdardyń sany 200-den asady. Shamamen osynyń ishinde 200-ge tarta ǵylymi eńbek baǵalanyp, olardy jazǵan adamdarǵa ǵylymi ataqtar berilip jatyr», - dedi ol.
Vitse-ministr osylaisha talaptardy kúsheite otyryp, ǵylymi eńbekterdiń aldymen sheteldik jýrnaldarda moiyndalýyna mańyz beriletinin atap ótti.
«Eńbektiń aǵylshyn tilinde jariialanýyn da talaptardyń biri etip aldyq. Sebebi álemdegi ǵalymdar da bir máseleni zertteý kezinde osy eńbekterdi oqi alatyndai bolýy kerek», - dedi ol.
