Internet qoldanýshylary óz áreketine jaýap berýi kerek dep oilaimyz. Bundai pikirdi QR Aqparat jáne kommýnikatsiialar ministri Dáýren Abaev málim etti, dep habarlaidy QazAqparat.
«Taǵy bir ózekti másele internet-resýrstarda qoldanýshylardyń anonimdi pikir jazýyna tyiym salý. Iaǵni, qoldanýshylardyń tirkelýin mindetteý kózdelip otyr. Qandai da bir pikir jazý úshin adam eń aldymen tirkelýi kerek. Keibir aqparat quraldary men qoǵamdyq uiymdar jasyryn pikir qaldyra almaý, erkin oi aitýǵa núkte qoiady dep sanaidy. Biraq bizdiń oiymyzsha, pikir bildirýge bul eshqandai kedergi jasamaidy, qaita qoldanýshynyń ishki tártibin kúsheitedi», - dedi Dáýren Abaev óziniń Feisbýk paraqshasynda aqparat jáne kommýnikatsiialar salasyna qatysty zań jobasyn túsindiretin videojoldaýynda.
Onyń paiymynsha, osynyń barlyǵy eń aldymen azamattardyń múddesin qorǵaýdan týyndaidy.
«Qazir qarap otyrsaq, ultaralyq, dinaralyq janjalǵa shaqyrý, jala jabý, jeke basqa tiisý, alaiaqtyq jasaý oqiǵalary kóbeiip ketti. Sonyń saldarynan qarapaiym azamattar zardap shegýde. Sondai bir pikirdiń kesirinen birin-birin tanymaityn adamdar janjaldasyp jatsa ne bolady? Sol sebepti de biz internet qoldanýshylary óz áreketine jaýap berýi kerek dep oilaimyz. Bul talap birte-birte ár adamnyń ishki filtrine ainalýy qajet. Onyń ústine qazir muny jasaý tehnikalyq turǵydan esh qiyn emes. Saittar ony op-ońai jasai alady», - dedi ministr.
