Foto: Freepik
Qasym-Jomart Toqaev quqyq qorǵaý organdarynyń keńeitilgen alqa májilisinde sóz sóilep, internet jáne telefon alaiaqtyǵynyń aldyn alý máselesine arnaiy toqtaldy, dep habarlaidy Ult.kz.
Prezident qylmystyń bul túri Qazaqstanda ǵana emes, búkil álemde beleń alǵanyn aitty. Kóbine mundai iske tyńǵylyqty uiymdasqan qylmystyq toptar barady.
"Olar shetelden áreket etetindikten, tergeý amaldaryn qiyndatady. Sondyqtan bul rette aldyn alý sharalarynyń máni zor.
Ótken jyly Ulttyq bank janynan zamanaýi antifrod-ortalyq ashyldy. Olar kúmán týdyrǵan operatsiialardy anyqtap, buǵattap otyrady", - dedi ol.
Sonymen qatar ózderine tiesili infraqurylymdy paidalana otyryp jasalǵan alaiaqtyq úshin bankter men uialy bailanys operatorlaryna da jaýapkershilik belgilep jatqanyn aitty.
"Alaiaqtar aqshany jylystatatyn nemese syrtqa shyǵaratyn quityrqy ailalaryna adamdardy aldap túsiredi. Bul da úlken problemaǵa ainaldy. Azamattarymyz paidaǵa kenelemiz dep olarǵa bank esepshottaryn berip qoiady. Biraq bul áreketteriniń saldary qandai aýyr bolatynyn oilai bermeidi", - dedi Prezident.
Memleket basshysynyń aitýynsha, sońǵy bir jarym jylda 50 myńnan astam adam osyndai jaǵdaiǵa dýshar boldy. Ókinishke qarai, olardyń basym bóligi – jastar.
"Atalǵan máseleniń bir ushy baqylaýsyz sim-karta ainalymyna kelip tireledi. Tek biyldyń ózinde sim-kartalardy basqa bireýdiń atyna rásimdegen 100 myńǵa jýyq fakti anyqtaldy. Nómirlerdi túrli qylmystyq maqsatqa paidalanady.
Úkimetke ýákiletti organdarmen birlese sim-kartalardy satý tártibin retteýdi jáne olardy taratqany úshin mobildi operatorlardyń jaýapkershiligin kúsheitýdi tapsyramyn", - dep tapsyrma berdi Memleket basshysy.
