فوتو: Freepik
قاسىم-جومارت توقاەۆ قۇقىق قورعاۋ ورگاندارىنىڭ كەڭەيتٸلگەن القا مەجٸلٸسٸندە سٶز سٶيلەپ, ينتەرنەت جەنە تەلەفون الاياقتىعىنىڭ الدىن الۋ مەسەلەسٸنە ارنايى توقتالدى, دەپ حابارلايدى Ult.kz.
پرەزيدەنت قىلمىستىڭ بۇل تٷرٸ قازاقستاندا عانا ەمەس, بٷكٸل ەلەمدە بەلەڭ العانىن ايتتى. كٶبٸنە مۇنداي ٸسكە تىڭعىلىقتى ۇيىمداسقان قىلمىستىق توپتار بارادى.
"ولار شەتەلدەن ەرەكەت ەتەتٸندٸكتەن, تەرگەۋ امالدارىن قيىنداتادى. سوندىقتان بۇل رەتتە الدىن الۋ شارالارىنىڭ مەنٸ زور.
ٶتكەن جىلى ۇلتتىق بانك جانىنان زاماناۋي انتيفرود-ورتالىق اشىلدى. ولار كٷمەن تۋدىرعان وپەراتسييالاردى انىقتاپ, بۇعاتتاپ وتىرادى", - دەدٸ ول.
سونىمەن قاتار ٶزدەرٸنە تيەسٸلٸ ينفراقۇرىلىمدى پايدالانا وتىرىپ جاسالعان الاياقتىق ٷشٸن بانكتەر مەن ۇيالى بايلانىس وپەراتورلارىنا دا جاۋاپكەرشٸلٸك بەلگٸلەپ جاتقانىن ايتتى.
"الاياقتار اقشانى جىلىستاتاتىن نەمەسە سىرتقا شىعاراتىن قۇيتىرقى ايلالارىنا ادامداردى الداپ تٷسٸرەدٸ. بۇل دا ٷلكەن پروبلەماعا اينالدى. ازاماتتارىمىز پايداعا كەنەلەمٸز دەپ ولارعا بانك ەسەپشوتتارىن بەرٸپ قويادى. بٸراق بۇل ەرەكەتتەرٸنٸڭ سالدارى قانداي اۋىر بولاتىنىن ويلاي بەرمەيدٸ", - دەدٸ پرەزيدەنت.
مەملەكەت باسشىسىنىڭ ايتۋىنشا, سوڭعى بٸر جارىم جىلدا 50 مىڭنان استام ادام وسىنداي جاعدايعا دۋشار بولدى. ٶكٸنٸشكە قاراي, ولاردىڭ باسىم بٶلٸگٸ – جاستار.
"اتالعان مەسەلەنٸڭ بٸر ۇشى باقىلاۋسىز سيم-كارتا اينالىمىنا كەلٸپ تٸرەلەدٸ. تەك بيىلدىڭ ٶزٸندە سيم-كارتالاردى باسقا بٸرەۋدٸڭ اتىنا رەسٸمدەگەن 100 مىڭعا جۋىق فاكتٸ انىقتالدى. نٶمٸرلەردٸ تٷرلٸ قىلمىستىق ماقساتقا پايدالانادى.
ٷكٸمەتكە ۋەكٸلەتتٸ ورگاندارمەن بٸرلەسە سيم-كارتالاردى ساتۋ تەرتٸبٸن رەتتەۋدٸ جەنە ولاردى تاراتقانى ٷشٸن موبيلدٸ وپەراتورلاردىڭ جاۋاپكەرشٸلٸگٸن كٷشەيتۋدٸ تاپسىرامىن", - دەپ تاپسىرما بەردٸ مەملەكەت باسشىسى.
