Nur-Sultan qalasy Kriminaldyq politsiia basqarmasynyń Kiber qylmyspen kúres bóliminiń aǵa jedel ýákili Saiat Dúisenbaev internet alaiaqtaryna qandai jaza qoldanylatyny týraly aitty, dep habarlaidy QazAqparat.
«Qazirgi ýaqytta alaiaqtar áleýmettik jeli arqyly qylmys isteidi. Politsiia departamenti osy ýaqytqa deiin toppen qylmys istegen alaiaqtardy ustap kórgen joq. Sońǵy eki aida qalalyq politsiia departamentine internet alaiaqtarynyń qurbany bolǵanyn aityp, habarlasqan 50 jábirlenýshiniń 17-si – zeinetker», - deidi Saiat Dúisenbaev.
Onyń aitýynsha, qalada internet alaiaqtyqqa qatysty 5 qylmys ashyldy.
«Atalǵan faktiler boiynsha 5 qylmysker ustaldy. Qylmystyq kodektiń 190-baby 2-bólimi 4-tarmaǵy boiynsha qylmystyq is qozǵaldy. QR Qylmystyq is júrgizý kodeksiniń 68 jáne 37-baptaryna súiene otyryp, jábirlenýshiler men kúdiktiler mámilege keldi. Internet alaiaq mundai qylmysty birinshi ret jasaǵan bolsa, sondai-aq keltirilgen zalaldy óndirip beretin bolsa jábirlenýshi men kúdikti kelisimge kelip, qylmystyq is qysqartylady», - deidi ol.
Sondai-aq, interne alaiaq buǵan deiin de osyndai faktiler boiynsha birneshe ret qylmystyq jaýapqa tartylǵan bolsa, qylmystyq is sotqa joldanyp, sot qaýlysymen 4-7 jyl aralyǵyna bas bostandyǵynan aiyrylady.
«Internet alaiaqtyń qansha jylǵa bas bostandyǵynan aiyrylatyny keltirilgen materialdyq shyǵynǵa bailanysty. Qazirgi ýaqytta anyqtalǵan faktiler boiynsha jábirlenýshiler tarapynan shyqqan shyǵyn 100-250 myń teńgeden bastalady», - dedi Saiat Dúisenbaev.
