Keshe Semeide ótken jiynda onomastika komissiia músheleri men maslihat depýtattarynyń maquldaýymen qala ortalyǵyndaǵy Internatsional kóshesi abaitanýshy, sháhkárimtanýshy, Alashorda azamattarynyń ómiri men shyǵarmalaryn tereń zerttep, qazaq ádebieti men tarihynyń saqtalýyna, onyń damýyna ólsheýsiz úles qosqan ǵalym-ustaz Qaiym Muhamedhan Seiitqululynyń atyna berildi.
Osydan biraz ýaqyt buryn bul bastamany Dina Qaiymqyzy kóterip, oǵan birqatar qoǵam qairatkerleri men ǵalymdar, jýrnalister úles qosqan bolatyn. Aǵymdaǵy jyldyń basynda ShQO ákimdiginiń baspasóz hatshysy Erlan Jaqypov atalmysh máseleni oblys basshysy Danial Ahmetov óz baqylaýynda ustap otyrǵanyn, jyl sońyna deiin tiisti sharalar atqarylatynyn málimdegen edi.
Biyl el Táýelsizdiginiń 25 jyldyǵy ári ǵalymnyń týǵanyna 100 jyl tolýyna orai bul jańarý semeilikter úshin ǵana emes, jalpy qazaq halqy úshin tamasha syi bolyp otyr.
Aita keteiik, búgingi tańda Qaiym Muhamedhannyń atyna Óskemen qalasynan da kóshe ataýyn berý máselesi qaralyp jatyr.
Azamat Bitan,
Ult portaly
