Qazaqstanda insýlttan qaitys bolǵan er adamnyń dene músheleri 5 adamǵa sátti aýystyryldy. Ota Qazaqstannyń birneshe hirýrgiialyq ortalyǵynda jasaldy, dep habarlaidy QazAqparat.
Donordyń baýyry A.Syzǵanov atyndaǵy Ulttyq ǵylymi hirýrgiialyq ortalyǵyna jetkizildi.
«Ota dúisenbi kúni jasaldy. Túski 13:00 shamasynda baýyr Pavlodardan jetkizildi. Iaǵni, men baýyrdy 15:00 shamasynda aýystyrdym. Bul óte kúrdeli organ bolǵandyqtan, operatsiia 6 saǵatqa sozyldy. Organ 38 jastaǵy baýyr tsirrozyna shaldyqqan er adamǵa salyndy. Qazir naýqas jansaqtaý bóliminde jatyr. Dárigerler jaǵdaiyn baqylaidy. Aǵza bóten organdy qabyldamaýy da múmkin», - dedi A.Syzǵanov atyndaǵy Ulttyq ǵylymi hirýrgiialyq ortalyǵy AQ basqarma tóraǵasy Bolatbek Baimahanov.
Onyń aitýynsha, qaitys bolǵan adamnyń múshelerin alý úshin týystarynan QR «Halyq densaýlyǵy jáne densaýlyq saqtaý júiesi» kodeksine sáikes ruqsat alynǵan.
«Qaitys bolǵan jigitten ókpesi, júregi, baýyry, 2 búiregi alyndy. Ol jigit insýlttan kóz jumǵan bolatyn. Transplantatsiia birneshe qalada ótti. Bir adamnyń músheleri birneshe adamnyń ómirin qutqardy», - dedi ol.
Onyń aitýynsha, ota tegin jasalǵan.
«Qazaqstan azamattaryna ota tegin jasalady, al sheteldikterge - aqyly. Qazir qalada 500-ge jýyq patsient transplantatsiiaǵa muqtaj. Bul tizim jii ózgerip turady», - dedi ol.
Bolatbek Baimahanov otandyq dárigerlerdiń kásibi biliktiligin joǵary baǵalady.
«Biz birneshe jyldan beri transplantologiiamen ainalysyp kelemiz. Ainalasy 6 saǵat ishinde organdy alyp, muqtaj adamǵa aýystyryp úlgerý - álemdik deńgei dese de bolady. Mundai nátije Eýropanyń keibir elderi, tipti AQSh pen Japoniiada joq», - dedi maman.
Professor Qazaqstanda Almaty, Nur-Sultan, Shymkent, Aqtóbe qalalarynda ǵana transplantatsiia jasalatynyn aitty. Búirekti barlyq qalanyń mamandary aýystyrsa, baýyrdy tek eki qalada, bir qalada júrek pen ókpeni aýystyrady.
