Aqtaý qalasynyń turǵyny Instagram áleýmettik jelisinde jariialaǵan videosy úshin sot aldynda jaýap berdi. Sot sheshimimen bloger daýly jazbany óshirip, jábirlenýshilerge moraldyq ótemaqy tóleýge mindetteldi. Bul týraly QR Joǵarǵy soty habarlady, dep habarlaidy ult.kz.
Is materialdaryna sáikes, bloger qylmystyq is aiasynda júrgizilgen tergeý áreketteriniń bir sátin videoǵa túsirip, ony Instagram paraqshasynda jariialaǵan. Beinejazbada osy iske qatysy bar qala turǵyndarynyń beinesi kórsetilgen.
Alaida talap qoiýshylar ózderiniń beinesin jariialaýǵa kelisim bermegenderin aityp, sotqa júgingen. Olar videony áleýmettik jeliden alyp tastaýdy jáne moraldyq ziian úshin ótemaqy óndirýdi talap etken.
Aqtaý qalalyq №2 soty jaýapkerdiń ózin qoǵam qairatkeri nemese shtattan tys jýrnalist retinde tanystyrýǵa qatysty ýájderin negizsiz dep tapty. Sot jariialanǵan beinematerial azamattyń kelisiminsiz taratýǵa zańmen ruqsat etiletin jaǵdailarǵa jatpaitynyn atap ótti.
Sonymen qatar, sot beinejazbanyń keńinen taralýy men oǵan jazylǵan pikirler talap qoiýshylarǵa moraldyq ziian keltirgen degen qorytyndyǵa keldi.
Nátijesinde sot blogerge Instagram-daǵy videony óshirýdi, sondai-aq eki talap qoiýshynyń árqaisysyna 200 myń teńgeden, jalpy 400 myń teńge kóleminde moraldyq ótemaqy tóleýdi mindettedi.
Sot sheshimi zańdy kúshine endi.
Eske salaiyq, buǵan deiin Almatyda ákesinen zorlyq kórgenin málimdegen bloger qyzdyń 10 táýlikke qamalǵany týraly habarlanǵan bolatyn.
