Soldan ońǵa qarai: Resei vitse-premeri Vitalii Mýtko, prezident Vladimir Pýtin, prezident kómekshisi Igor Levitin jáne Sankt-Peterbýrg gýbernatory Georgii Poltavchenko. 2017 jyl.
Resei prezidentiniń kómekshisi, burynǵy kólik ministri Igor Levitinniń otbasyna Máskeý túbindegi shamamen bir milliard rýbl turatyn jyljymaityn múlik tiesili. Bul týraly Insider basylymy jazdy, dep habarlaidy Azattyq.
"Dovil" kottedjder qalashyǵyndaǵy záýlim úi men qatar ornalasqan eki jer telimi prezident kómekshisiniń jieni Aleksandra Levitina men qyzy Iýliia Zverevaǵa tiesili. Árbir jer teliminiń aýmaǵy – 25 sotyq. Basylym kottedjder turǵyzylǵan jer teliminiń árqaisysyn 534-549 mln rýblge baǵalaidy. Insider basylymynyń aqparaty boiynsha, bul úiler prezident isi jónindegi basqarmaǵa arnalyp salynǵan.
Buǵan deiin "Vajnye istorii" basylymy Levitin otbasynyń quny keminde 300 mln dollar bolatyn aktivti basqaratynyn habarlaǵan.
Igor Levitin memlekettik qyzmette 16 jyldan astam jumys jasaǵan. 2004-2012 jyldary kólik ministri bolyp turǵan kezde qaltaly úkimet músheleriniń qataryna kirgen. Deklaratsiiaǵa sensek, ol byltyr prezident ákimshiliginiń ózge qyzmetkerlerine qaraǵanda kóbirek (43 mln rýbl) tabys tapqan.
Leonid Levitin 1999 ben 2005 jyldar aralyǵynda "Magistral" kompaniia tobyna jaqyn kólik mekemesinde jumys istegen. Keiinirek "Magistral" toby "Magistral konteinernye linii" kompaniiasyna ainaldy. Reseidiń óz ishinde jáne halyqaralyq deńgeide júk tasymaldaýmen ainalysatyn top - naryqtaǵy iri oiynshylardyń biri: olardyń Aziia elderinde óz ókildigi bar, keiinirek floty da paida bolǵan.
