QR Indýstriia jáne infraqurylymdyq damý vitse-ministri Talǵat Janjúmenov senator Nurlan Qylyshbaevtyń ókpeni jasandy jeldetetin otandyq apparattardyń bir bóligin densaýlyq saqtaý uiymdary qabyldamaǵany týraly málimdemesine jaýap berdi, dep habarlaidy QazAqparat.
«1 qarashadaǵy jaǵdai boiynsha myń jarym ÓJJ apparaty elimizdiń 297 emdeý mekemesine jetkizildi, barlyǵy iske qosylǵan jáne paidalanýǵa daiyn. Qazirgi ýaqytta 140 apparat qoldanysta, qalǵandary rezervte tur. Bul kezeńde Nur-Sultan qalasynda ÓJJ apparattary uzaǵyraq qoldanylatyny baiqaldy – barlyq apparat jumysyna shaǵym-eskertý túsken joq. Ótken aptada Semeide bir kompressordyń azdaǵan aqaýy boldy, bir táýlikte bul kompressor aýystyryldy. Biz Qazaqstan tarihynda alǵash ret ÓJJ statsionarlyq tsifrlyq apparatyn igerdik», - dedi Talǵat Janjúmenov ministrlikte ótken brifingte.
Vitse-ministr apparattardyń qalai jasalatynyn túsindirip ótti.
«QR Úkimetiniń tapsyrmasymen Indýstriia jáne infraqurylymdyq damý ministrligine qysqa merzimde otandyq ÓJJ apparattaryn óndirýdi uiymdastyrý tapsyryldy. Bul jumys eki jarym aiǵa jalǵasty jáne úsh kezeńnen turdy: birinshisi - apparatty tańdaý, Densaýlyq saqtaý ministrligimen birlesip, álemniń túrli óndirýshileriniń bes apparatyn tańdadyq, onyń arasynda túrkiialyq Biyovent apparaty barlyq qajetti talaptarǵa sai keldi. Ekinshi kezeńde biz qysqa merzimde túrik úkimetimen jáne «Qazaqstan Aselsan injiniring» bas zaýytymen kelissóz júrgizdik. Úshinshi kezeńde atqarý jumystaryn uiymdastyrdyq. Zaýyt úsh aýysymdyq jumysqa aýysty, onda 250 qyzmetker jumys isteidi, ÓJJ apparattaryn jasaý joldary úiretildi. Biyovent apparaty aǵylshyn tilinde istegendikten, bizdiń mamandar orys tiline aýdarma jasady jáne Densaýlyq saqtaý ministrliginiń talabymen ár ÓJJ apparatyna kompressorlar men ylǵaldaýyshtar qoiyldy», - dep túsindirdi T. Janjúmenov.
Buǵan deiin senator Nurlan Qylyshbaev respýblikalyq biýdjet qarajatyn jumsaýdy, ásirese memlekettiń áleýmettik mindetterdi oryndaýyna jáne COVID-19-ǵa qarsy kúres jónindegi sharalarǵa bailanysty tásilderdi qaita qaraýǵa shaqyrdy.
«Indýstriia jáne infraqurylymdyq damý ministrligi Úkimet rezerviniń qarajaty esebinen otandyq óndirýshiden 1500 dana ÓJJ apparatyn satyp alǵan, 17 óńirdiń densaýlyq saqtaý uiymdary is júzinde tek 831-in ǵana qabyldady. Qalǵan 669 ÓJJ apparaty tolyqtyrylmaǵany úshin qabyldanbaǵan», - dep málimdedi depýtat.
